Vdiq Presidenti, Rroftë Kryeministri!
nga Agim Popoci
Në vitin 1422, kur u shpall vdekja e mbretit Charles VI dhe u shpall automatikisht Charles VII për mbretin e Anglisë, u tha: Le Roi mort, vive le Roi! /Lexo shqip: Vdiq mbreti, rroftë Mbreti!/ Mbrëmë, 598 vjet pas këtij rasti, Presidenti i Republikës së Shqipërisë e shpalli “vdekjen” më 26 Prill 2021 dhe tha se do të jetë Kryeministër!
Ilir Meta, ky mjeshtër i madh i shantazhit dhe rreziku më i madh i Shqipërisë, këtë e bëri të ditur përmes mediave që ka në shërbim, pasi kishte shpallur datën e zgjedhjeve parlamentare më 25 Prill 2021, duke sqaruar se do të jap dorëheqje nga posti i Presidentit, dhe do të kandidoj për Kryeministër dhe Ministër të Brendshëm!
Dhe jo vetëm kaq!
Përveç se pagëzon veten si Kryeministër dhe Ministër të Brendshëm, Ilir Meta “zgjedh” edhe Presidentin e Republikës, Rexhep Mejdanin!
Duke njohur mirë Ilir Metën, shumë prej tyre këtë paralajmërim e konsiderojnë si mjet presioni ndaj kryetarit të PD, Lulzim Basha, dhe pse jo kryetarit të PS, Edi Rama, por ky “mjet” në duart e Metës është shumë më shumë se sa presion, sepse cenon qenien tonë kombëtare!
Sikur të vepronte drejtësia në këtë vend, sot Ilir Meta do të ishte një ish-i burgosur dhe bazuar në ligjin e dekriminalizimit askush nuk do të shqetësohej as për LSI sh.a. as krijuesin e saj që llomotitë orë e çast dhe ka degjeneruar institucionin e Presidentit!
Por, sot, gjithçka ndryshon dhe asgjë nuk duhet të shpërfillet! Ilir Meta është President, nesër mund të bëhet Kryeministër ose Zv/Kryeministër, pse jo dhe Ministër i Brendshëm, por e mira e gjithë kësaj çmendurie është se kjo vetëm nga Meta nuk varet përkundër proklamimeve që bëjnë mediat që ka në shërbim.
Nëse, bazuar në pakënaqësinë e përgjithshme popullore dhe sondazhet reale, Partia Demokratike më 25 Prill fiton zgjedhjet, shantazhi i Ilir Metës asfiksohet dhe nuk i bënë derman as Internacionalja Socialiste, as Edi Rama dhe as shqiponja që mbanë në duar në përpjekje për ta rikthyer pushtetin kriminal të vitit 2001.
Nëse çudia ndodhë, dhe rezultati i dy partive të mëdha PD-PS është i ngushtë, atëherë Shefat e Ilir Metës në Beograd, ashtu si në vitin 2013, do të marrin situatën nën kontroll; Dhe, lajmi që u dha mbrëmë me “burime nga presidenca” edhe mund të jetësohet me ndihmën e krimit.
Ndryshe, shpërfillja e paralajmërimit që erdhi mbrëmjen e 10 Shtatorit nga Ilir Meta, nuk do të sjellë më të papritura. Aq më shumë, kur në mendësinë e tij kriminale vazhdon dhe qarkullon ideja se Shqipërinë mund ta drejtojnë vetëm 2-3 njerëz dhe se zgjedhjet i fiton paraja dhe jo vota!
Që të mos ndodhë kjo, sot, kur është e qartë se Edi Rama e shkatërroi Shqipërinë me ndihmën e Ilir Metës, dhe ky i fundit nuk meriton të jetë as kërpudhë para Kryeministrisë, janë shqiptarët që me votën e tyre do ti tregojnë vendin këtij pazarxhiu të pushtetit, pasurisë dhe tokës shqiptare.
Më 25 Prill, të gjithë ata shqiptarë që i shitën dinjitetin e tyre Ilir Metës ose drogaxhive të Edi Ramës, duhet t’ia rikthejnë dinjitetin qenies së tyre kombëtare, tashmë për të ruajtur përveç se tokës dhe detit, edhe ajrin shqiptar.
Më 25 Prill 2021, shqiptarët duhet ti japin fund edhe këtij tranzicioni të mbrapsht i cili nisi si i tillë, për të mos kthyer më kokën pas nga epoka kriminale e Metës me Rexhepin, ku Qeveria vjedhë thesarin e shtetit, vret liderin e demokracisë dhe degjeneron edhe të vdekur Nënën Mbretëreshë Geraldinë; Ose largqoftë Ilir Metës dhe Beogradit, që të trembesh me Kryeministrin jo vetëm nga PPP-të por edhe kur hap telefonin dhe të hallakatë veshin zëri i njeriut që nuk e do më as taksisti: Edi jam!
Vetëm në këtë mënyrë, shqiptarët mund të zgjohen të qetë më 26 Prill! Jo vetëm pse nuk do të sundohen nga Ilir Meta dhe të ngjashmit, por as nga krimi që është ulur këmbëkryq, aty ku mbante era shtet, dhe sot i jep të drejtë vetes edhe të thotë se boll më isha President, do jem Kryeministër.
Dhe, pasi ta kenë kthyer besimin te vetja e tyre, shqiptarët do ta kuptojnë se, po, edhe qeverinë e radhës do ta rrëzojnë; Me votë, nëse Qeveria nuk është në shërbim të qytetarëve!
