Me protokoll Anti-COVID-19, sot 480 mijë nxënës nisën vitin e ri shkollor

Sot 480 mijë nxënës dhe 30 mijë mësues nisën vitin e ri shkollor 2020-2021 në një situatë ndryshe, që e dikton pandemia e koronavirusit. Në shkolla do të ndiqet një protokoll i veçantë sigurie, në mënyrë të tillë që të minimizohet përhapja e COVID-19.

Kështu, ndryshe nga vitet tjera, ky vit shkollor do të zhvillohet në disa shkolla me 2, 3 apo dhe 4 turne, në mënyrë të tillë që fluksi i nxënësve të jetë më i vogël në klasa, pasi nëpër banka lejohet vetëm nga një fëmijë dhe të pajisur detyrimisht me maska.

Një ditë para nisjes së vitit të ri shkollor e rihapjes së klasave, Ministrja e Arsimit, Besa Shahini rikujtoi rëndësinë e masave Anti-COVID që të ruhet shëndeti i të gjithëve e të sigurohet proces i mbarë shkollor.

Sot janë dhe 94 shkolla që nuk do të hapin dyert por më vonë.

Viti i ri shkollor nisi sot dhe në Kosovë ku janë shpërndarë 500 mijë maska për nxënësit e mësuesit. Mbajtja e tyre është e detyrueshme, ashtu si respektimi i distancës e higjiena.