Dita e katërt e grevës, naftëtarët në Ballsh: S’ka kthim pas!

Në ditën e katërt të grevës së urisë, gjendja shëndetësore e naftëtarëve të Ballshit po rëndohet ndërkohë vazhdojnë të jenë pa përgjigje për kërkesat e tyre madje ende s’kanë as asistencë shëndetësore.

”Do të vazhdojmë, se një problem kemi, ekonomik. Deri në orën e fundit. Derisa të marrim zgjidhje. S’ka kthim pas. S’kemi arsye të tjera, jemi nga ana ekonomike zero. Ndaj, kemi fëmijët në shkollë. Jemi dhe pa bukë. Jemi krimbur në borxhe. Të sëmurë jemi. Nuk shkojmë të vizitohemi sepse s’kemi lekë për ilaçe. Na premtuan për 7 paga që të linim grevën e urisë. Jo vetëm nuk na i dhanë, na hoqën dhe nga puna,” tha një naftëtar ndërsa kolegu i tyre e bëri të qartë se greva e tyre e urisë do të vazhdoj deri sa të vdesin.

”Sa vjen dhe rëndohem. Më merret fryma në gjoks, ndjej një si helm, dhimbje të këmbëve, gjunjëve, ja shtrirë. Derisa të vdesim këtu jemi,” tha naftëtari i cili ka marrë vendimin ekstrem ndërsa e pranon se tashmë është i pashpresë.

“Çfarë do bëj në shtëpi unë? S’kam ti çoj bukë kalamajve. S’ka tjetër rrugë. I kam humbur shpresat.”