Pas testimit të sistemit rus të mbrojtjes, SHBA kërcënon Turqinë

Shtetet e Bashkuara kanë paralajmëruar aleatin e NATO-s, Turqinë për pasoja serioze pasi ushtria turke testoi një sistem rus të mbrojtjes raketore S-400 të prodhuar nga Rusia.

Departamenti amerikan i Mbrojtjes dënon në termat më të fortë të mundshëm provën e Turqisë të 16 Tetorit të sistemit të mbrojtjes ajrore S-400, tha zëdhënësi i Pentagonit, Jonathan Hoffman duke shtuar:

“Ne kundërshtojmë testimin e këtij sistemi nga Turqia, i cili rrezikon pasoja serioze për marrëdhëniet tona të sigurisë.”

Departamenti i Shtetit nga ana e tij e quajti provën e Turqisë të papranueshme dhe një hap të qartë në drejtim të gabuar.

Në Stamboll, presidenti turk Recep Tayyip Erdogan konfirmoi se testet ishin realizuar dhe se do të vazhdojnë.

“Ne nuk do të kërkojmë leje nga Amerika,” tha Erdogan para gazetarëve.

Të dy aleatët e NATO-s, raporton RFE, kanë qenë prej kohësh në mosmarrëveshje rreth sistemit ajror të mbrojtjes S-400 dhe Washingtoni pezulloi Turqinë nga programi i saj i avionëve luftarakë F-35 vitin e kaluar pas blerjes së sistemit të mbrojtjes raketore.