Me Kodin e ri Zgjedhor, ja çfarë i pret demokratët, Rama: Po votuat Lulin, do keni Monikën dhe Ilirin!
Kryeministri Edi Rama sot nga foltorja e Parlamentit kishte mesazhe të shumta, nga eurodeputetët që nuk i përfilli, zyrtarët e BE që nuk i llogariti fare, Rudina Hajdarin që i dha leksione demokracie, dhe në fund një mesazh të veçantë kishte dhe për demokratët pasi miratoi Kodin e Ri zgjedhor, duke i bërë të qartë se nëse më 25 prill votojnë Lulzim Bashën, i pret dhe Monika Kryemadhi e Ilir Metën.
“Më shkruanin dje 8 eurodeputetë jemi të tronditur. Për cfarë? Do i përgjigjem me shkrim. Po për cfarë janë tronditur? Si mund të presim Venencian deri në dhjetor kur ligji ka kaluar dy javë më parë, pas një procesi që ka marr vite. Për cfarë janë të tronditur? Janë të keqinformuar qëllimisht duke shfrytëzuar marrëdhëniet ndërpartiake e pastaj thonë kryeminstër shpresojmë të vesh interesat e Shqipërisë para. Pa asnjë dyshim. Shqipëria kalon një reformë, falë këtij parlamenti dhe shkon në zgjedhje. Ligji ka kaluar, kushtetuta është ndryshuar. Venecia është i mirëseardhur kur të vi do e shohim dhe do hapim një diskutim n ga e para nëse do ketë nevojë. Po zgjedhjet e 25 prillit nuk presin më asnjë këshill politik.” u shpreh Rama.
Partia Demokratike mund ta ketë harruar përvojën e hidhur me LSI-në gjatë qeverisjes 2009-2013, por siç duket Edi Rama ende se ka marrë veten nga koalicioni me Liken, dhe sot e shprehu duke paralajmëruar demokratët:
“Me siguri më 25 prill ne, PS, nuk do të kemi vend. Ju do të jeni mbledhur të gjithë te Pallati i Kongreseve për të hapur sesionin e ri. Kam vetëm një detyrim ndaj demokratëve, ndaj votuesve, zgjedhësve demokratë. Imagjinoni cfarë iu pret o demokratë. Do shkoni në zgjedhje si te Vehbiu e te Sudja, jep një, merr dy,” tha Kryeministri Edi Rama duke përfunduar:
“Do jepni votën për Lulin, e do keni mbrapsht edhe dy të tjerë, se aritmetika e Lulit është 1+1 bëjnë 3, pra do të keni dhe Monikën e Ilirin. Kjo është ajo që do iu ndodhë. Cfarë po iu pret më 25 prill me gjithë këtë fitore të madhe është detyrim që unë tua them demokratëve. Do e shikoni pas se çfarë vjen kur PD bëhet bashkë me LSI.”
