Shifrat në rritje, Komiteti i Ekspertëve ANTICOVID-19 kthen orën policore në Shqipëri. Ja masat e reja…
Duke pasur parasysh shtimin e transmetueshmërisë së infeksionit dhe me qëllim parandalimin e përhapjes së COVID-19, sot Komiteti i Ekspertëve bëri të ditur masat e reja shtrënguese përmes Zv/ministres Mira Rakacolli, masa të cilat do të hyjnë në fuqi duke nisur nga dita e mërkurë, dhe do të zgjasin për tre javë.
“Kemi analizuar me hollësi dhe në detaje rezultatin e masave të marra deri më tani si dhe eksperincën e vendeve përreth. Kemi evidentuar se në Shqipëri është vënë re një shtim i transmetueshmërisë së infeksionit. Është rritur edhe incidenca. Në kushtet ku nuk ka ende një kurrë, mënyra më e mirë është parandalimi.
Duke analizuar shifrat, shkaqet, rekomandimet e organizatës së OBSH-së komiteti propozon të merren disa masa në përputhje me strategjinë tone vjeshtë-dimër. Ne vlerësojmë se duhet ti marrim këto masa dhe i konsiderojmë ato të domosdoshme për pengimin e përhapjes së këtij infeksioni,” tha Rakacolli duke analizuar shifrat, rekomandimet e OBSH për këtë fazë, si edhe eksperiencën në Botë, e Europë, komiteti propozon të merren disa masa:
Masa e propozuara:
1. Kufizimi i lëvizjes nga ora 22:00 – 06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme.
2. Ndalohen aktivitetet e bareve – restoranteve nga ora 22:00 – 06:00 (përvec shërbimit delivery).
3. Smart-working për administratën publike (sipas specifikës së sektorit) në zbatim të protokolleve të sigurisë. Përjashtim bëjne strukurat ofruese të shërbimeve duke zbatuar protokollet e sigurisë.
“Masat për kufizimin e përhapjes së infeksionit Sars-Cov2, propozohen të qëndrojnë për një periudhë 3 javore me efekt rishikimi cdo dy javë në varësi të dinamikës së situatës epidemiologjike,” u shpreh Rakacolli duke përfunduar:
“Propozohen të vendosen në të gjithë vendin pavarsisht përhapjes së epidemisë në vend. Sipas skenarëve të riskut, evidentohen zona me nivel të ulët të riskut, zona me nivel mesatar të riskut dhe zona me nivel të lartë risku.”
