Toka nuk po qetësohet në Maqedoninë e Veriut, sërish një seri e lëkundjeve të forta

Pas lëkundjeve të forta të tokës në orën 04:54, Maqedonia e Veriut sërish u godit nga tri pasgoditje të forta dhe të gjitha afër qytetit të Gostivarit, ku ajo e orës 15:25, sipas Qendrës Sizmologjike Mesdhetare, EMSC, ishte me magnitudë 4.9 të shkallës Rihter, thellësi 10 km. Epiqendra ishte vetëm 20 km nga qyteti i Gostivarit dhe 60 km nga Prizreni ka bërë që ky tërmet të ndjehet edhe në Kosovë ndërsa është ndjer edhe në Tiranë.

Por kjo goditje e fuqishme, sipas EMSC, pasoi atë të orës 13:26 e cila ishte me magnitudë 3.7 të shkallës Rihter dhe me thellësi vetëm 2 km. Epiqendra e këtij tërmeti ishte 18 km nga Gostivari dhe 62 km nga Prizreni.

Ndërkohë në orën 11:59, EMSC raporton se tërmeti ishte me magnitudë 3.8 të shkallës Rihter, 18 km nga Gostivari dhe vetëm 58 km nga qyteti i Prizrenit.

Për momentin nuk raportohet për dëme në njerëz ose materiale, por kjo seri e lëkundjeve të tokës ka shkaktuar panik ndër qytetarët e Maqedonisë së Veriut, Kosovë dhe Shqipëri.