COVID-19 prek edhe U.D. Presidenten e Kosovës, Vjosa Osmani
Ushtruesja e detyrës së Presidentit të Kosovës, Vjosa Osmani ka njoftuar se ka rezultuar pozitive në testin për koronavirusin e ri. Pas marrjes së rezultatit, vetë presidentja Vjosa Osmani e ka bërë të ditur se gjatë dy javëve të ardhshme do të vazhdojë punën nga shtëpia.
“Të nderuar qytetarë! Pasi disa të afërm me të cilët kisha kontakt rezultuan pozitivë në testin për COVID-19, u testova në IKSHKP dhe pak më parë u njoftova se edhe unë kam rezultuar pozitiv,” thekson Vjosa Osmani duke bërë të ditur se në dy javët e ardhshme do të punoj nga shtëpia:
“Duke u kujdesur që secili dokument a vendim që kërkon shqyrtim e vendimmarrje dhe që lidhet me përgjegjësitë e mia në të dy funksionet shtetërore që i ushtroj, të trajtohet në kohë. Po ashtu, një numër takimesh do t’i vazhdoj nëpërmjet platformave elektronike.”
Në fund, duke theksuar se përkundër kujdesit maksimal, po shihet që këto ditë virusi është kudo, më i përhapur se kurrë më parë, njëjtë i rrezikshëm si çdoherë, U.D. Presidentja e Kosovës, Vjosa Osmani përfundon:
“Prandaj, uroj që ta tejkalojmë këtë sfidë bashkërisht, duke mos e injoruar rrezikun nga virusi dhe kujdesin që duhet treguar.”
Ndryshe, sot Instituti i Shëndetit Publik në Kosovë raportoi për 690 raste të reja me koronavirus dhe 16 jetë të humbura nga koronavirusi gjatë 24 orëve të fundit. Ndërsa prej 13 marsit e deri më sot, 495 persona janë infektuar me koronavirus, 849 prej të cilëve kanë vdekur dhe 17.878 janë shëruar.
