Mbi 3 milionë raste me koronavirus, Rusia sot me numër rekord

Sot Rusia e ka kaluar pragun e 3 milionë rasteve me koronavirus në vendin ku vala e dytë ka arritur kulmin ndërsa autoritetet vazhdojnë të rezistojnë me vendimin mbi karantinën në nivel shtetëror.

Sipas të dhënave zyrtare tashmë janë 3.021.964 raste me COVID-19 dhe 54.226 të vdekur. Rusia, e cila renditet e katërta në botë me përfshirjen nga epidemia, ka 29.258 raste të reja dhe 567 të vdekur gjatë 24 orëve të fundit.

Shqetësuese është situata në Moskë dhe zonat e varfëra ku klinikat nuk janë të pajisura fare.

Të dhënat e autoriteteve ruse dëshmojnë për nivelin më të ulët të vdekshmërisë se sa në Evropën perëndimore dhe Shtetet e Bashkuara, argument për të cilin Presidenti i Rusisë, Vladimir Putin, mburret me muaj të tërë. Madje në konferencën vjetore para gazetarëve ai tha se Rusia e ka menaxhuar situatën me pandeminë më mirë se Perëndimi.

Akuzat perëndimore mbi manipulimin rus të shifrave, autoritetet në Rusi ju përgjigjen me faktin se pas obduksionit, në statistikë përfshihen vetëm rastet e vdekjes me shkakun kryesor, COVID-19!

Agjencia shtetërore ruse e statistikave, Rosstat, në tetorin e vitit 2020 ka raportuar 50 mijë të vdekur më shumë se sa në tetorin e vitit 2019. Nga marsi deri në tetor kishte 165 mijë të vdekur më shumë se sa në të njejtën periudhë të vitit të kaluar, që flet për një situatë shumë më të rëndë se sa atë që e pranon regjimi i Vladimir Putinit.

Rusia miraton vaksinën edhe për të moshuarit

Ndërkohë Ministria e Shëndetësisë e Rusisë miratoi vaksinën kundër sëmundjes COVID-19, për përdorim te personat mbi 60 vjeç.

Ministri i Shëndetësisë, Mikhail Murashko, tha sot se vaksina ruse, Sputnik, tani është aprovuar për të gjithë personat mbi 18 vjeç. Murashko tha se provat tani kanë demonstruar se vaksina është e sigurt edhe për këtë grup kështu që të moshuarit do të përfshihen menjëherë në programin e vaksinimit.

Ndryshe, deri më sot, njerëzit e moshuar kanë qenë të përjashtuar nga programi i vaksinimit masiv në Rusi.