Dokumenti/ I kërkoi dorëheqjen, Drejtori i QSUT largon nga puna mjekun Ilir Allkja!
Pas letrës publike ku i kërkoi dorëheqjen, Drejtori i Përgjithshëm i Qendrës Spitalore Universitare “Nënë Tereza”, Enkelejd Joti, ka larguar nga puna mjekun e Urgjencës, Ilir Allkja.
Sipas Jotit, Allkja ka shkelur kodin etik të punonjësit, prandaj nuk duhet të vijojë të jetë më mjek pranë këtij shërbimi shtetëror.
“Mjeku Allkja ka dezinformuar publikun me deklarata. Deklarimet e tij ishin të rreme, kjo ka përhapur panik,” thekson në arsyetimin e tij Drejtori i Përgjithshëm i QSUT, Enkelejd Joti.
Ndryshe, mjeku Ilir Allkja pas denoncimeve të shumta mbi keqmenaxhimin e pandemisë COVID-19, ditë më parë i është drejtuar përmes një Letre publike, Drejtorit të Përgjithshëm të QSUT, Enkelejd Joti ku i kërkon dorëheqje pasi nu ka moral të drejtoj klasën më të edukuar të vendit.
“Unë prej 10 muajsh po përjetoj fort dhe terrorin e administratës tuaj partizane kundër personit tim, dhe këtë e kam të dokumentuar zoti drejtor. Jam thirrur aty si në hetuesinë e kohës së monizmit duke më kërkuar llogari se pse flas për testimet, infektimet, mungesat, ndërkohë që unë jam mjek, dhe kontribuoj prej 28 vitesh në sistem duke punuar, e jo duke përfituar, siç përflitesh ti!” thekson ndër të tjera Dr.Allkja duke shtuar:
“Ti zoti drejtor jeton e mbretëron në Shqipërinë pa drejtësi, shërbëtor i një kryeministri që nuk ka nguruar të më linçojë publikisht mua, që dhe kolegët e mi të mbyllin gojën, dhe nuk ke asnjë kompleks faji për krimin ndaj një mjeku kritik ndaj sistemit,” shprehet mjeku i Urgjencës në QSUT ndërsa i kërkon dorëheqjen:
“Ti del akoma më zhveshur n.q.s unë të sfidoj publikisht duke të kërkuar CV tënde, arsyet pse drejtoni institucionin akademik të mjekësisë në Shqipëri, që mban edhe emrin e një gruaje të shenjtë, por që drejtohet nga anonimë të djallëzuar si ju! Sot unë nuk po zgjatem me skandalet financiare për të cilat përflitesh. Jep dorëheqjen zoti Enkelejd Joti!” thekson Ilir Allka në letrën e tij publike më 26 Dhjetor duke përfunduar”
Ti s’mund të nënshtrosh deri në skaj klasën e mjekëve të Shqipërisë!
