Haberi i Kryeministrit, Basha: Vaksina më e mirë, largimi përfundimtar i Edi Ramës!
Pas haberit të të Kryeministrit Edi Rama për vitin 2021 se 10.750 vaksina Pfizer do të vijnë javën e tretë të Janarit ndërsa janë siguruar 500 mijë, ka reaguar Kryetari i Partisë Demokratike, Lulzim Basha, duke theksuar se edhe me vaksinat e njëjta histori si me dështimet e Ramës këto 7 vjet, dhe sot vaksina më e mirë për Shqipërinë është largimi i Ramës.
“Si përherë Rama përpiqet t’i shesë dështimet si suksese. Shqipëria është vendi që jep ndihmën më të vogël ekonomike për qytetarët e saj. Rama premton të sjellë shumë pak vaksina, dhe shumë vonë krahasuar me vendet e tjera. Serbia ka nisur ndërkohë vaksinimin, ndërsa Rama shkoi në Nju Jork për të blerë këpucë të reja! Ky i dështuar duhet të largohet nga qeverisja, që Shqipëria të ndryshojë e të shpresojë sërish,” thekson Lulzim Basha në reagimin e tij përmes rrjetit social Facebook, reagim pas të cilët u bë i gjallë edhe shefi i propagandës së Kryeministrit, Endri Fuga, i cili harron se publikimet në rrjetet sociale nuk i lexon vetëm pjella e tij, Erion Veliaj, por edhe njerëz që kanë celular në dorë, dhe, mashtron:
“Zoti Lulzim kur ti fle Edi Rama vazhdon punon, kurse ti edhe kur punon fle! Maqedonia e Veriut, Mali Zi, Kosova s’kanë siguruar ende asgje, ndërsa Serbia e nisi me vetëm 5 mijë doza! Fli zoti Lulzim dhe mos bëj politikë me shëndetin e me vaksinën në gjumë! Shqipëria buzëqesh,” thekson Fuga përmes rrjetit social “Twitter” i cili të sakta i ka vetëm të dhënat e Beogradit, se sa për shtetet fqinje kishte rastin ta dëgjoj Kryeministrin e Kosovës në televizionin e shitur të Batonit se si janë porositur vaksinat Pfizer dhe çfarë ka premtuar BE!
Gjithsesi, Kryetari i Partisë Demokratike, Lulzim Basha, sqaroi shqiptarët se cila është vaksina më e mirë për Shqipërinë:
“Edhe me vaksinat e njëjta histori si me dështimet e Ramës këto 7 vjet. Premtoi 300 mijë vende pune dhe shtoi papunësinë dhe varfërinë, rriti koston e jetës dhe shkatërroi ekonominë. Vaksina më e mirë për Shqipërinë është largimi i Ramës. Vetëm kjo do na lëvizë nga dështimet drejt suksesit, nga dëshpërimi drejt shpresës.”
Ndryshe, përveç lajmit mbi 10.750 vaksina Pfizer që do të vijnë javën e tretë të Janarit, Kryeministri Edi Rama tha se 30.250 në muajin shkurt e me radhë, deri sa shqiptarët të shohin edhe ëndrrën kryeministristore, 500 mijë.
