BB paralajmëron rënien e shpenzimeve buxhetore, shkak borxhi i lartë

Përtej vitit 2021, shpenzimet e qeverisë ka të ngjarë të kufizohen nga hapësira e kufizuar fiskale. Situata buxhetore mund të përkeqësohet në një skenar të rënies së ritmeve të rritjes së të ardhurave. Në këtë rast, qeveria do të duhet të zvogëlojë më tej shpenzimet kapitale që mos e rrisë më tej raportin e borxhit ndaj PBB-së, paralajmëron Banka Botërorë, BB, në azhurnimin e fundit Ekonomik për Evropën dhe Azinë Qendrore.

Banka parashikon se sektori i shërbimeve, i udhëhequr nga turizmi dhe ndërtimi pjesërisht, do të jenë nxitësit kryesorë të rimëkëmbjes. Sektori i ndërtimit do të nxitet nga procesi i rindërtimit të pasojave të tërmetit shkatërrues të 26 nëntorit 2019, argumentoi Banka.

Zhvillimet në sektorin e turizmit dhe udhëtimeve do të jenë nën presionin e kufizimeve derisa sa të kryhet vaksinimi global. Nën këtë skenar, Banka Botërore parashikon që ekonomia e vendit të rritet me 4.4 për qind në vitin 2021, nga 5.5% që janë pritshmëritë në parashikimet kombëtare.

Varfëria pritet të bjerë me rreth 2 pikë përqindje, në linjë me rimëkëmbjen. Në vitet në vijim, konsumi privat do të luajë një rol gjithnjë e më të rëndësishëm, mbështetur nga procesi i rindërtimit. Investimet private do të kontribuojnë në rritjen ekonomike, nëse qeveria vazhdon të zbatojë reformat e klimës së biznesit.

Deficiti i llogarisë korente pritet të ngushtohet në 8.8 për qind të PBB-së në 2021 dhe të bjerë më tej në 6.5 për qind, në përputhje me tendencat e para krizës, si rrjedhojë e përmirësimit të bilancin tregtar.

Me rritjen e aktivitetit ekonomik, të ardhurat parashikohet të rikuperohen në 27.6 për qind të PBB-së në 2022-2025. Borxhi publik i Shqipërisë parashikohet në 79.5 për qind të PBB-së në 2021.

Perspektiva e punësimit varet kryesisht nga rikuperimi i sektorëve të shërbimeve dhe rindërtimi. Udhëtimet dhe shërbimet ishin sektorët më të goditur dhe gjatë vitit pandemik.

Ekonomia e Shqipërisë u rrit me 3.3 për qind në 2015-2019. Disa projekte të mëdha të energjisë së rinovueshme, zgjerimi në turizëm dhe eksportet e fason ndikuan në rritjen e PBB-së dhe rritjen e punësimit.

Banka referoi se Shqipëria ka nivel të ulët të produktivitetit në raport me vendet e tjera të rajonit dhe nëse pagat rriten vendi humb konkurueshmërinë. Ndërmarrjet e Vogla dhe të Mesme (NVM) përfaqësojnë më shumë se 90% e bizneseve dhe mbështeten në krahun e ulët të punës me paga të ulëta. Aksesi i kufizuar në financa, mungesa në logjistikë dekurajon investimet private, ndërsa të ardhurat e pakta publike kufizojnë investimet publike në infrastrukturë dhe në kapital njerëzore./Monitor/