Presidenti i ri i Kosovës, Vjosa Osmani
Me 71 vota për dhe 11 vota të pavleshme, Parlamenti zgjodhi President të ri të Kosovës, Vojsa Osmanin.
Pas dështimit të dy raundeve të votimit, ku në raundin e parë nga 81 vota Vjosa Osmani mori 69, në raundin e dytë nga 82 vota mori 67, në raundin e tretë, Vjosa Osmani nga gjithsejtë 82 vota mori 71 vota.
Ndryshe, sipas Kushtetutës së Kosovës, në raundin e tretë zgjedhet President ai kandidat që të paktën ka 61 vota.
Biografia
Vjosa Osmani – Sadriu u lind më 17 maj të vitit 1982, në qytetin e Mitrovicës, Kosovë. Shkollën fillore dhe atë të mesme, e përfundoi me sukses të shkëlqyeshëm në qytetin e saj të lindjes. Studimet themelore i përfundoi në Fakultetin Juridik të Universitetit të Prishtinës, ndërsa studimet master dhe doktoraturën e përfundoi në Universitetin e Pitsburgut, në SHBA, ku u dallua në mesin e qindra studentëve ndërkombëtarë. Përgjatë të gjitha fazave të studimit, ajo ishte bursiste. Ajo ka ligjeruar në Universitetin e Prishtinës, në R.I.T. Kosovo dhe në Universitetin e Pitsburgut. Si profesoreshë universiteti në Kosovë ajo ligjëron lëndë nga fusha e së Drejtës Ndërkombëtare, ndërkaq në Amerikë ligjëron lëndën “Shtet-ndërtimi dhe e Drejta: Përvoja e Kosovës”.
Ka shërbyer si kryetare e Komisionit për Punë të Jashtme, Diasporë dhe Investime Strategjike, Kryetare e Komisionit për Integrime Evropiane dhe nënkryetare e Komisionit për Reforma Kushtetuese në Kosovë.
Në zgjedhjet e 6 tetorit të viti 2019 u zgjodh deputete e Parlamentit të Kosovës dhe kryetare e kësaj legjislature të Parlamentit të Kosovës.
Si Kryetare e Parlamentit, pas dorërheqjes së Presidentit Hashim Thaçi, ishte Ushtrues e Detyrës së Presidentit.
Në zgjedhjet e 14 Shkurtit, Ishte personi më i votuarnë Kosovë me 300.788 vota.
Krahas ndërtimit të karrierës së suksesshme, Vjosa është martuar dhe është nënë e dy vajzave binjake.
Angazhimi politik i familjes së Vjosës, ndikoi në formimin dhe angazhimin e saj politik. Karriera politike e Vjosës filloi qysh në adoleshencë, kur edhe ishte aktiviste e LDK-së, për t’u ngritur më pas ndër vite. Më 27 gusht të vitit 2009, Vjosa Osmani – Sadriu u zgjodh shefe e stafit të Presidentit të atëhershme të Republikës së Kosovës, Fatmir Sejdiu. Në tri mandate, Osmani ishte deputete e Parlamentit të Kosovës nga radhët e LDK-së, ndërsa në këtë legjislaturë pjesë e Listës Vjosa dhe Lëvizjes Vetëvendosje.
Ndonëse në moshë të re, ajo njihet për kontributin e saj të dhënë për pavarësimin e Kosovës, saktësisht njihet kontributi i saj në Gjykatën Ndërkombëtare të Drejtësisë (GJND), ku në atë kohë ishte pjesë e palës kosovare në mbrojtjen e ligjshmërisë së pavarësisë së Kosovës, rast të cilin Kosova e kishte fituar kundrejt Serbisë. Në këtë proces jetik për pavarësimin e vendit, Vjosa ka shërbyer si përfaqësuese e Kosovës.
