Vjosa Osmani merr zyrtarisht detyrën e Presidentes së Kosovës
Presidentja e Kosovës, Vjosa Osmani, e ka pranuar sot zyrtarisht detyrën me ceremoni shtetërore.
Pas parakalimit në tapetin e kuq nderuar nga toga ceremoniale e Forcës së Sigurisë së Kosovës, ajo ka marrë detyrën nga kryetari i Parlamentit, Glauk Konjufca, i cili ishte Ushtrues i Detyrës së Presidentit.
Në ceremoninë e marrjes së detyrës së Presidentit të Kosovës, përveç bashkëshortit dhe vajzave të Osmanit, kanë qenë të pranishëm edhe ambasadorët e vendeve të QUINT-it dhe kryeministri i Kosovës, Albin Kurti.
Në fund të ceremonisë Presidentja e Kosovës, Vjosa Osmani me bashkëshortin dhe dy vajzat ka hyrë në Presidencë.
Se Presidente e Kosovës, Vjosa Osmani e nisi detyrën duke bërë homazhe para bustit të Presidentit Ibrahim Rugova dhe më pas në Kompleksin Memorial “Adem Jashari”.
“Jam këtu që me rastin e marrjes së detyrës të nderoj veprën dhe kujtimin e arkitektit të shtetit dhe të pavarësisë së vendit tonë, presidentin historik dr. Ibrahim Rugova i cili siç e thash edhe në ditën e betimit tim si presidente në Kuvend ai i ka dhënë politikës dimensionin më të çmueshëm të saj, dimensionin human dhe njëkohësisht ka arritur që Kosovën dhe sakrificën e popullit të saj ta bëj të njohur në të gjithë botën. Mbështetja që ai siguroi për vendin tonë, miqësitë që ai siguroi për shtetin tonë, akoma janë ndër bazamentet më të fuqishme të lirisë sonë, të pavarësisë sonë, të demokracisë qe ende jemi në ndërtim e sipër,” tha Presidentja Vjosa Osmani.
Presidentja e Republikës së Kosovës, Vjosa Osmani Sadriu, ka vendosur buqetë me lule edhe tek Monumenti “Heroinat” dhe Memoriali i të pagjeturve për të vazhduar rrugën drejt Prekazit:
Pas homazheve te varrezat e familjes Jashari në Kompleksin Memorial në Prekaz, Presidentja e Kosovës, Vjosa Osmani, tha se nderimi më i madh që mund t’u bëjnë heronjve është puna e ndershme për qytetarët e vendit. Vizitën në Prekaz, Osmani e ka bërë në ditën e saj të parë të punës si presidente.
“Sakrifica e familjes Jashari qëndron në themelet e lirisë sonë dhe si e tillë duhet jo vetëm të kujtohet por ta përcjellim brez pas brezi, të mësohet nga gjeneratat e reja nga fëmijët tanë, por edhe nga fëmijët e fëmijëve tanë në mënyrë që të gjithë ta kuptojmë që ishte pikërisht këtu ku u pagua çmimi më i lartë për lirinë të cilën e gëzojmë sot. Prandaj edhe kujtimi i tyre është shndërruar në përjetësi, është shndërruar në udhërrëfyesin dhe dritën më të rëndësishme në hapat që ne i bëjmë përpara për ta shtyrë Kosovën tonë, shtetin tonë të dashur drejt sukseseve. Nderimi më i madh që ne do të mund të ja bëjmë te gjithë heronjve, te gjithë atyre që ranë për vendin tonë do të jetë në qoftë se punojmë mirë, punojmë drejt dhe punojmë ndershëm për qytetarët tanë, për të gjithë ne që i mbijetuam tmerrit dhe gjenocidit të shkaktuar nga shteti serb,” tha Presidentja e Kosovës, Vjosa Osmani e cila ishte e shoqëruar nga anëtari i Familjes Jashari dhe kryetari i Skenderajt, Bekim Jashari.
