A ka lidhje dorëzimi i mandatit të deputetit nga Tahiri me vizitën e deputetit gjerman në Tiranë?
Kuvendi ka nisur punimet në seancën e përjavshme plenare, ndërkohë që deputeti Sajmir Tahiri paralajmëroi heqjen dorë nga mandate i deputetit, pasi artikuloi një seri akuzash, duke përfshirë edhe Kryeministrin Rama dhe ministrin e Brendshëm, Xhafaj.
Opozita kishte paralajmëruar më parë se nuk do të kishte seancë normale në Kuvend përderisa në sallën e Kuvendit të ishte Sajmir Tahiri, i cili ndodhet nën hetim për lidhjet me grupet kriminale në trafikun e drogës.
Opozita akuzon prej kohësh Edi Ramën se ka marrë në mbrojtje politike Tahirin, duke mos lejuar organin e akuzës të veprojë.
Dorëzimi i mandatit nga ana e Tahirit vjen në të njëjtën ditë kur Shqipërinë e viziton deputeti gjerman Florian Hahn, që është edhe zëdhënës për Zgjerimin në Bundestag.
Nuk dihet nëse ka lidhje mes aktit të dorëzimit të mandatit të deputetit nga Tahiri dhe vizitës së deputetit gjerman, i cili gjatë vizitës së Kryeministrit Edi Rama në Berlin, ka ngritur shqetësimin lidhur me hetimet për ish-ministrin e Brendshëm.
