Aksioni policor në veri, Prokuroria: Kryesisht në pronat e Milan Radoiçiç!

Me urdhër të gjykatës dhe prezencë të Prokurorit Special, sot Policia e Kosovës ka kryer kontrolle në pesë lokacione në tre komunat në veri, Mitrovicë e Veriut, Zveçan dhe Zubin Potok, lidhur me sulmet terroriste mëngjesin e 24 shtatorit në Banjskë ku mbeti i vrarë polici Afrim Bunjaku.

Zëvendëskomandanti i Policisë së Kosovës për rajonin e Veriut, Veton Elshani, tha për RFE se kontrollet në këto lokacione kanë nisur pas orës 06:00 dhe lidhen me zhvillimet në Banjskë.

Elshani tha se nuk ka persona të arrestuar, por që kontrollet janë kryer në disa vende specifike.

Prokurori special i angazhuar në këtë rast, Naim Abazi, tha për “Betimi për Drejtësi” se aksioni policor i ditës së sotme është zhvilluar kryesisht në pronat që janë evidentuar si prona të të dyshuarit Milan Radoiçiç të cilat janë seskuestruar.

Ndërkohë vetë krimineli Milan Radoiçiç e ka pranuar se ka udhëhequr dhe organizuar sulmin terrorist kundër Policisë së Kosovës duke shfajësuar Serbinë dhe Presidentin e saj po aq kriminal, Aleksandar Vuçiç.

Sipas informacioneve të RFE në terren, pjesëtarët policorë në Mitrovicë të Veriut kanë qenë te spitali i qytetit.

Aty, hetuesit kanë kërkuar që të kontrollohet një aneks ku gjendet ngrohtorja.

Drejtori i spitalit, Zllatan Ellek ka konfirmuar për mediat se policia i ka konfiskuar incizimet monitoruese dhe nuk ka gjetur asgjë tjetër të dyshimtë.

Zyrtarët policorë kanë qenë edhe te restoranti Gray në Mitrovicën e Veriut, i cili besohet se është në pronësi të Ema Radoiçiqit, bashkëshortes së nënkryetarit të Listës Srpska, Milan Radoiçiç.

Policia tha se kontrollet i ka kryer në koordinim me misionin e Bashkimit Evropian për sundim të ligjit, EULEX dhe misionin e NATO-s në Kosovë, KFOR.

Reagimet e Listës Serbe dhe Zyrës për Kosovën në Qeverinë e Serbisë

Lista Srpska, partia kryesore e serbëve në Kosovë dhe nën kontrollin e Vuçiçit, tha se njësitet speciale të Policisë së Kosovës kanë hyrë brutalisht në spitalin në Mitrovicë të Veriut dhe i ka akuzuar zyrtarët policorë për “brutalitet të tepruar”.

Në një komunikatë për media, kjo parti, e cila e gëzon mbështetjen e Beogradit zyrtar, ka thënë se kryeministri i Kosovës Albin Kurti është duke i shfrytëzuar zhvillimet në Banjskë “për t’i justifikuar të gjitha aktivitetet antiserbe në Kosovë dhe Metohi, si dhe për të vazhduar keqtrajtimin e mëtejshëm të qytetarëve tanë”.

Zyra për Kosovën në Qeverinë e Serbisë, tha se policia e ka dëmtuar derën hyrëse të spitalit dhe ka pretenduar se nga aksioni policor janë shqetësuar banorët e zonës.

Si, Lista Srpska, ashtu edhe Zyra për Kosovën në Qeverinë e Serbisë e kanë kritikuar, siç kanë thënë ato, mosreagimin e EULEX-it në aksionin policor.

Radoiçiq pranon përgjegjësinë për sulmet në Banjskë

Në Beograd, avokati Goran Petronijeviç lexoi një letër në emër të Millan Radoiçiçit, përmes së cilës ai mori përgjegjësinë për sulmet në veri.

Avokati, duke e lexuar letrën e Radoiçiçit, tha se për veprimet e tij, Radoiçiq nuk e ka njoftuar askënd prej strukturave qeveritare serbe apo atyre politike lokale në veri të Kosovës, dhe as nuk e ka pranuar “ndonjë ndihmë” prej tyre.

“Arsyeja e kthimit tonë ishte inkurajimi i serbëve, popullit të asaj zone, për t’i rezistuar terrorit të regjimit të Kurtit, duke mbrojtur njerëzit tanë, që çdo ditë i ekspozohen atij terrori,” tha ai.

Ministri i Brendshëm i Kosovës, Xhelal Sveçla e ka publikuar një pamje me dron, duke thënë se njëri prej burrave – që shihet i veshur me uniformë me armë në dorë – ka qenë vetë Radoiçiç.

Parlamenti i Kosovës e ka miratuar dje një rezolutë, e cila e dënon sulmin terrorist në Banjskë dhe përmend nevojën e një hetimi ndërkombëtar për Serbinë dhe rolin e saj në këtë sulm.

Presidenti i Serbisë, Aleksandar Vuçiç, raporton RFE, tha se sulmuesit kanë qenë serbë të Kosovës, të ngopur nga terrori i Kurtit, dhe e ka mohuar përfshirjen e shtetit të tij në këtë sulm.