Çerekfinalja EURO 2024, përballja e rivalëve të mëdhenj
Sot Gjermania dhe Spanja do të përballen në orën 18:00 në Shtutgart, në derbin e çerekfinales së EURO 2024 që vlerësohet se do të përcaktoj dhe kampionin e Evropës.
Performanca e kombëtares gjermane deri më sot ka konfirmuar Gjermaninë në radhën e parë të kandidatëve për fituesin e Kampionatit Evropian të Futbollit, ndryshe nga vlerësimi që ishte në fillim të kampionatit për ngadhnjimin gjerman pas titullit të vitit 1996.
Spanja nga ana tjetër ka treguar një kombëtare bindëse për kampionin e EURO 2024 madje dhe sot kur përballet me Gjermaninë në çerekfinale, dhe këtu favorizohet edhe nga e kaluara.
Përballja më e rëndësishme është ajo e vitit 2008 në finalen e Kampionatit Evropian të Futbollit në Austri, ku Spanja doli fituese me golin e Fernando Torres në minutën e 32-të.
Vetëm dy vjet më vonë u takuan në Kampionatin Botëror në Afrikën e Jugut, ku rezultati u përsërit por ai që e fundosi kombëtaren gjermane ishte Carles Puyol.
Në grupe të Kampionatit Evropian u përballën në vitin 1984 ku Spanja fitoi 1:0 ndërsa në vitin 1988 Gjermania fitoi 2:0.
Në fund, as përballja e fundit në mes të kombëtares gjermane dhe asaj spanjolle në vitin 2021 për Ligën e Kombeve nuk e favorizon Gjermaninë e cila humbi 6:0.
Ndërsa në Hamburg, Portugalia dhe Franca në orën 21:00 do të dëshmojnë se çfarë kanë korrigjuar nga përballjet deri në çerekfinalen e EURO 2024 që nuk lanë shije aspak të mirë, aq më pak shijen e një kampioni të Kampionatit Evropian të Futbollit.
Portugalia ndoshta edhe mund të fshijë hijen e zezë pas ndeshjes me Sloveninë të cilën e kaloi me shumë vështirësi, dhe për dallim nga Franca sot mund të mburret vetëm me përballjen me Turqinë, të cilën kombëtarja franceze nuk do ta ketë të lehtë ta harrojë për shumë kohë.
Ndërsa Franca ndoshta dhe e ka radhën të shënoj gjatë lojës pasi sot në çerekefinale arriti me dy autogola dhe një penallti, ndërkohë favorizohet nga e kaluara.
Përballjet e këtyre dy kombëtareve fillojnë nga viti 1926 që duke përfshirë dhe ndeshjet miqësore, Franca ka korr 19 fitore, ka pësuar 6 humbje nga Portugalia dhe janë shënuar 3 barazime. Sa i përket përballjeve të mëdha, një herë ishin në fazën e grupeve, tre herë ishin në gjysmëfinale dhe një herë Franca dhe Portugalia u përballën në finale.
Ndoshta francezët nuk e kanë harruar finalen e EURO 2016 në Paris kur me golin historik të Éder, Portgualia fitoi titullin e kampionit, që gjithashtu portugezët nuk do ta harrojnë sepse e fituan kur Ronaldo u lëndua në lojë.
Në Kampionatin e Kaluar Evropian, Franca dhe Portugalia u gjendën në “grupin e vdekjes” me Gjermaninë dhe Hungarinë, ku spektakli përfundoj me katër golat e shënuar, dy nga Cristiano Ronaldo dhe dy nga Karim Benzema.
