Është Sali Berisha, o budallenj!
nga Agim Popoci
“Berisha e vrau opozitën me listat e mbyllura” ishte kapaku që i biri i sigurimsit Mehdi Bushati i vuri “Pazarit Rama-Berisha” që u artikulua për ditë të tëra nga bedelët e Edi Ramës, sapo u bënë publike ndryshimet e Kodit Zgjedhor që do të miratohen në parlament!
Sot, kur këto ndryshime u miratuan, kur analisti i mrekullueshëm, siç e cilësoi Doktori, kapi arkivolin dhe po pret varrimin e opozitës, një re skepticizmi përfshiu dhe ca demokratët që janë lodhur nga terrori i Sigurimit të Shtetit dhe qeverisja kriminale e Edi Ramës, duke mos arritur ti imagjinojnë zgjedhjet e vitit 2025 pa listat e hapura!
Jam Sali Berisha o budallenj, ishte refreni që shpesh e përsëriste lideri demokrat nga foltorja e parlamentit, me idenë që t’ju lehtësoj veprimin politik kundërshtarëve si dhe t’ju kursej energjitë e tyre kriminale, duke rikujtuar nga ana tjetër bashkëpartiakët e tij se pse duhet të qëndrojnë me dinjitet para një kaste komuniste kriminale që vazhdon dhe lufton për pushtet, me çdo çmim!
Por, siç duket, regjimi i stërgjatur ka prodhuar si babëzi ashtu dhe uri për pushtet!
Analisti i mrekullueshëm me të ngjashmit mund ta ketë kalkuluar një gjëmë të tillë me listat e mbyllura edhe një vit para zgjedhjeve, por, kalkulatori i tij ashtu si dhe i bedelëve të Edi Ramës është i kuq, dhe nuk tregon se si mund të munden komunistët në këto rrethana!
Sikur ti shtojmë dhe votën e diasporës, e cila ju nënshtrua një trajtimi të veçantë skepticizmi sapo u miratua mbrëmjen e së premtes si ndryshim i Kodit Zgjedhor, duke thurur legjenda mbi manipulimin e votës përmes postës nga regjimi i Edi Ramës si me zarf, ashtu dhe korruptim të postës private dhe varrimin në KQZ nga Ilirian Celibashi, gjëma e sajuar e Sigurimit nuk përkeqëson asgjë pavarësisht se në pamej të parë është apokaliptike!
Ndryshe nga i biri i Mehdi Bushatit, demokratët duhet të jenë më komod dhe të respektojnë punën e çdo liridashësi pse PD ekziston, duke mos ra pre e propagandës së Sigurimit të Shtetit që vazhdon dhe numëron çdo demokrat që vjen ose nuk vjen poshtë ballkonit të Sali Berishës, për ta dhënë kumtin përmes mediave kombëtare kur ky numër është i vogël dhe shkon deri në 50!
Edhe para zgjedhjeve të vitit 2001 Sali Berisha u arrestua, Shtetet e Bashkuara i vunë vizën dhe nuk mbështetej jo nga 50 por as nga 5 demokratë. Besimi i tij në liri dhe drejtësi bënë që Ambasadori Limpreht ta ulë gishtin, demokratët ti mbushin sheshet dhe Sali Berisha pas zgjedhjeve të vjedhura të vitit 2001, të fitoj në vitin 2005, por, jo duke i hapur listat!
Ndërsa Zotni Lafsha që sot akuzon Sali Berishën për marrëveshje me Edi Ramën dhe i uron humbje të sigurt me lista të mbyllura, ishte deputet dhe ministër i realpolitikës së Berishës dhe jo listave të hapura; Politikë e cila mbetet e hapur edhe për rikthimin e tij në qeveri pavarësisht të gjithave, duke i zënë vendin pa pikë turpi, Genc Pollos! Jo se Zotni Lafsha me bedelët e tij bënë gjëmën më të vogël se andartët e Pollos, por, sepse ai që do ta bën qeverinë në vitin 2025 do jetë Sali Berisha i kompromiseve të mëdha, o budallenj!
Për të mos harruar votën e diasporës! Gjithçka çfarë është thënë për Edi Ramën si hajdut i votave është e vërtetë ashtu si dhe rreziku evident i votës në mërgim dhe postës me të cilën ajo do të transportohet deri në KQZ! Por, Sali Berisha ndryshe nga paraardhësi i tij i merr 500 mijë vota edhe pa logo, pa emër, pa vulë, pa lekë dhe pa diasporë; Nëse i kësaj i shtojmë mobilizimin e diasporës për të larguar njeriun që detyroi një milion shqiptar të marrin botën në sy, angazhimi i sigurimsave që u larguan në vitin 1991 në Perëndim do jetë minor, pasi një numër i konsiderueshëm i tyre u kthyen me pushtetin e vitit 2013, për të tjerët u kujdes biologjia!
Sot, kur përveç skeptikëve pa lista të hapura dhe atyre që nuk i besojnë votës së pakontrolluar të diasporës nga pushteti, ka dhe nga ata që nuk i besojnë një fitore elektorale pa një shpikje si KOP-i, oferta që po përgatitet me një kandidate për Kryeministre, do të qetësoj shumë shpirtra demokrat!
Jo vetëm pse kjo kandidate është një bankiere e njohur shqiptare që aktualisht punon në Perëndim, por, një kandidate e këtij niveli do të dëshmon një politikbërje që vazhdimisht prodhon, një seriozitet për qeverisje të ardhshme demokratike, dhe, një gatishmëri për kurimin e Shqipërisë së shkatërruar nga PPP-të e Edi Ramës! Si?!
Është Sali Berisha, o budallenj!
