FOTO/ Pyetja që nervozoi Ramën, reagimi ndaj gazetares dhe mimika e Kryeministrit…

Kryeministri Edi Rama u detyrua të braktisë një konferencë për mediat pas pyetjes së bërë nga gazetarja Ambrozia Meta, lidhur me ministrat e Brendshëm të emëruar prej tij, Saimir tahiri dhe Fatmir Xhafa, i pari në arrest shtëpie për trafikun e drogës dhe i dyti nën akuzat e opozitës se ka mbrojtur vëllanë e tij trafikant.

Rama u nervozua nga pyetja që iu drejtua, ndërsa u përpoq t’a anashkalonte përgjigjen duke u marrë me pronarin e medias.

Kryeministri nuk ka mundur të fshehë nervozizmin apo pakënaqësitë e pyetjes edhe në mimikën e tij, përveç me veprimin, kur u largua nga salla e konferencës.

Por debati me gazetaren ka vijuar edhe pas përfundimit të saj, kur Kryeministri me ton i është drejtuar gazetares duke i thënë se ka shkelur rregullat e konferencës për mediat. Nuk dihet se për çfarë rregullash e ka pasur fjalën Kreu i Qeverisë, pasi ka qenë vetë ai që ka pranuar pyetjet nga gazetarët.

Gazetarët që ishin në sallën e konferencave në Rinas thane se kryeministri i thirri gazetares duke iu drejtuar me fjalët: Të kesh turp, se nuk respekton rregullat e konferencës për shtyp.

‘Jo, unë nuk mund të pranoj të më thuash që po bëj propagandë, kur thjesht po të bëj pyetje’, i është përgjigjur gazetarja.

Debati Rama-gazetare

Rama: Kishe dhe një merak të fundit. Jepjani mikrofonin që ta heqë merakun.

Gazetarja: Në fakt, meraku im lidhej me pyetjen që ju bëra. Si ndiheni kur dy personat që i keni besuar ministrinë më të rëndësishme, i pari është në arrest shtëpie për trafik droge dhe i dyti akuzohet se ka mbrojtur të vëllanë. A nuk ka në PS përfaqësues që nuk kanë kushërinj ose vëllezër që merren me trafik droge që mund ta drejtonin këtë ministri?

Rama: së pari, njëhërë, janë dy gjëra krejt të ndryshme. Dhe së dyti, pyet pronarin se dhe ai ka një vëlla që, a do të ishte i gatshëm ai pronari juaj që të jepte llogari për vëllanë e tij?!

Gazetarja: Unë po ju pyes ju sepse jeni kryeministër dhe qeverisni vendin…

Rama: Jo, më falni, nuk jemi duke bërë debat. Ju bëtë pyetjen dhe kërkoni përgjigjen nga unë, apo jo?! Dhe përgjigja ime është kjo: Pyesni pronarin tuaj dhe thojini a ka ai vetë ndonjë përgjegjësi për vëllanë e tij se janë dhe në të njëjtën fushë të dy?!

Gazetarja: Pronari im nuk ka lidhje me rendin, me qeverisjen e vendit. Kështu që nuk e gjej qeverisjen tuaj me vend. Unë ju pyeta pse duhet të jetë kaq e diskutueshme një ministri, pse duhet të kemi gjithmonë ministra që implikohen në këtë sjellje për shkak se ajo ëhstë një nga ministritë më të rëndësishme të vendit. Kështu që nuk e gjej krahasimin tuaj me vend për pronarët e televizioneve që nuk lidhen me qeverisjen e vendit.

Rama: Kurse unë e gjej krejt pa etikë që ju vini këtu gazetare, për të bërë pyetje dhe merrni mikrofonin për të bërë propagandë. Kjo ëhstë pa etikë. Rregullat…

Gazetarja: Absolutisht nuk është propagandë.

Rama: Të lutem…rregullat…

Gazetarja: Nuk është propagandë, është pyetje referuar zhvillimeve të fundit . Kemi një ish-ministër që është në arrest shtëpie për trafik droge dhe kemi një ministër të Brendshëm që akuzohet se i ka krijuar imunitet të vëllait. Pyetja ime është përse duhet të jenë gjithmonë persona të tillë të implikuar në rate të tilla dhe të akuzuar? Nuk është propagandë.

Rama: Unë u tregova shumë respektues…

Gazetarja: Dhe unë jam shumë respektuese por nuk pranoj të thoni që po bëj propagandë. Sepse nuk ëhstë propagandë. Është thjesht një pyetje.

Rama: Hajde këtu dhe vazhdo konferencën e shtypit të thuash fjalën e fundit.