Gjenerali i ushtrisë së çmendur, Dikoviç: Serbia nuk ka pësuar disfatë nga NATO, ndoshta NATO ka pësuar nga Serbia!

Brukseli zyrtar me gjithë përpjekjet e tij për të evropianizuar Serbinë nuk po arrinë ta fus në shinat e BE-së asnjë segment të shtetit serb. Këtë së fundi e dëshmoi edhe Shefi i Shtabit të Përgjithshëm të Ushtrisë së Serbisë, Lubisha Dikoviç edhe pse si kryeministri ashtu edhe vetë gjenerali Dikoviç nuk pushojnë së deklaruari se Serbia ushtarakisht është neutrale.

Gjenerali Lubisha Dikoviç, i akuzuar për krime lufte në Kosovë, tha sot se pas bombardimeve të NATO-s në vitin 1999 është nënshkruar marrëveshja e cila qartë thotë se “ushtria jonë nuk ka pësuar disfatë, sepse aktivitetet e saj janë ndërprerë me marrëveshje”.

“Mos, ndoshta, NATO ka pësuar disfatë, sepse marrëveshja është nënshkruar me pjesëtarët tanë modestë, por trima të ushtrisë sonë”, citon  Dikoviçin Agjensia serbe e lajmeve FoNet me rastin e hapjes së ekspozitës kushtuar ushtarëve dhe policëve serbë të vrarë në luftën e vitit 1999 për Kosovën.

Dikoviç me këtë rast tha se ekspozita me titullin “Trimat e atdheut të rënë gjatë kohës së agresionit të NATO-s në vitin 1999”, është admirimi ndaj heronjve: “Ia kemi dalë që të mos i harrojmë. Ata kanë rënë në luftën e ndershme e të vështirë në të cilën kanë qenë të vendosur t’i kundërvihen NATO-s dhe ta mbrojnë atdheun.”

Në këtë ekspozitë janë publikuar fotografitë dhe emrat e 725 pjesëtarëve të ushtrisë serbe dhe të 417 policëve të vrarë në vitin 1999. “Ata janë viktima të dikujt. Fakti se e kanë mbrojtur vendin e vet, s’i ka dhënë askujt të drejtë t’i vrasë. Ata janë viktima për të cilët dikush duhet të japë përgjegjësi”, ka thënë me këtë rast ministri serb i Mbrojtjes Aleksandar Vulin duke shtuar se “Serbia me asgjë s’e ka provokuar agresionin e NATO-s”.