Hashim Thaçi mbërrin në Kosovë, viziton varrin e babait
Tre ditë pas varrimit të babait, Ish-Presidentit Hashim Thaçi, i është lejuar vizita në Kosovë. Lajmin e ka bërë të ditur Ish-Nënkryetari i OVL të UÇK-së, Nasim Haradinaj.
“E sollën sot në kohë të pa kohë, sa për sy e faqe e që nuk e kanë asnjë pikë në vetëvetën e tyre e le më ajo njerëzorja që ju mungonë në total,” shprehet Haradinaj përmes rrjetit social Facebook.
Duke konfirmuar vizitën e Ish-Presidentit Hashim Thaçi në Burojë të Skenderajit për të vizituar varrin e babait të tij Haxhi Thaçi, Zëdhënësi i Dhomave të Specializuara të Kosovës, Michael Doyle, tha se për arsye bindëse humanitare, trupi gjykues dhe gjyqtari i procedurës paraprake kanë udhëzuar Sekretarin që të menaxhojë një vizitë të mbikëqyryr në Kosovë për Hashim Thaçin që t’i bëjë nderimet dhe të jetë me familjen e ngushtë.
“I akuzuari mbetet në paraburgim dhe në paraburgim nga Dhomat e Specializuara,” tha zëdhënësi i Gjykatë Sepciale, Michale Doyle, duke shtuar se kjo është vizita e katërt në paraburgim e Hashim Thaçit në Kosovë.
Ndryshe, Dhomat e Specializuara të Kosovës në Hagë nuk i lejuan Hashim Thaçit pjesëmarrjen në varrimin e babait të tij, Haxhi Thaçi, të martën e 18 Marsit, gjë që shkaktoi reagime të mëdha.
Ish-Presidenti i Kosovës, Hashim Thaçi, i cili vazhdon të jetë i paraburgosur që nga viti 2020 në Hagë, nga Gjykata Speciale akuzohet për krime lufte dhe për ndikim te dëshmitarët.
