Homazhe, Berisha: Mirush Kabashi ishte gjeniu i skenës, teatrit dhe filmit

Mirush Kabashi ishte mbret në skenë dhe u largua si Sokrati i kësaj kohe, tha Kryetari i Partisë Demokratike, Sali Berisha, pas homazheve në nder të aktorit të madh shqiptar i cili mbylli sytë përgjithmonë më 5 Dhjetor.

“Erdha për të shprehur mirënjohjen, admirimin e pakufishëm për gjeniun e skenës, filmit dhe teatrit, Mirush Kabashin.

Por, për Mirushin ka gjithnjë celebrim të asaj trashëgimie që ky len për ne dhe brezat që vijnë.

Ai vërtet ndahet, por ndahet duke lënë një trashëgimi mahnitëse.

Ai ishte mbret në skenë, ndoshta askush tjetër nuk arriti të sublimohet në interpretimet e tij, në personazhet që mori përsipër.

Ai, e them, u largua si Sokrati i kësaj kohe, në sensin që me Apologjinë e Sokratit, shënoi ndoshta kulmin e tij në skenën shqiptare, por edhe atë ndërkombëtare,” tha Sali Berisha duke përfunduar:

“Ndaj edhe njëherë ngushëllime më të ndjera familjes, respektin më të madh për veprën e pavdekshme të Mirush Kabashit.”

Pasi për tre orë u mbajtën homazhe në Muzeun Historik Kombëtar, në nder të aktorit të madh shqiptar, Mirush Kabashi u përcjellë për në banesën e fundit. Ai do të prehet në varrezat e Sharrës.

Nderi i Kombit, Mirush Kabashi, u nda nga jeta dje në moshën 75-vjeçare, pas një beteje 3-vjeçare me një sëmundje të rëndë.