Izet Haxhia kalon natën e parë në burgun 302/ Ja çfarë thotë avokati për gjendjen e tij

Izet Haxhia, i ekstraduar dje nga Turqia, i dënuar në mungesë për vrasjen e Azem Hajdarit me 25 vjet heqje lirie, ndodhet në burgun 302 në Tiranë.

Gjykata e Ankarasë në Turqi mori vendimin për ekstradimin e tij në atdhe, pas 19 vitesh në arrati.

Izet Haxhia nuk e ka pranuar asnjëherë vrasjen e deputetit Azem Hajdari, një prej themeluesve të Partisë Demokratike.

Gjatë ditës së sotme, avokati i Izet Haxhisë, Fran Dashi, tha se do të kërkojë rihapjen e çështjes, që do të thotë rigjykim.

“Izeti është shumë i lumtur që pas 20 vitesh kthehet në atdhe. Është në gjendje të mirë, me memorie të pastër. Ju siguroj që shëndeti i tij është i plotë. Ne jemi duke studiuar aktet e para dhe pikësynimi dhe pretendimi jonë është për rihapur dosjen e nga para e pasi gjykimi dhe hetimi ndaj tij për 12 shtatorin, është bërë në mungesë. Gjykata e Shkallës së Parë në vitin 2001 ka deklaruar ikjen e të pandehurit duke caktuar avokat kryesisht. Ne kemi besim të plotë se çështja do shkojë drejt rihapjes”, tha avokati.

I pyetur mbi pretendimet se Izet Haxhisë mund t’i rrezikohet jeta, avokati tha: Nuk ka rrezik për jetën. Këtu jemi në vendin tonë, në Shqipëri

Izet Haxhiaj, është 52 vjeç, ka lindur në Babinë të Tropojës, dhe rezultonte i shpallur në kërkim ndërkombëtar, pasi Gjykata e Rrethit Gjyqësor Tiranë më 29 prill 2002 e ka dënuar me 25 vjet burg për veprat penale “Vrasje në rrethana të tjera cilësuese e kryer në bashkëpunim”, “Vrasje me paramendim e kryer në bashkëpunim” dhe “Vrasje me paramendim të mbetur në tentativë, e kryer në bashkëpunim”.