KS OKB për Kosovën / SHBA: Të ndërpritet misioni i UNMIK-ut
Përfaqësuesja e përhershme e Shteteve të Bashkuara në Këshillin e Sigurimit të OKB-së, Ambasadorja Nikki Haley, ka kërkuar nga KS i OKB-së që të ndërpres misionin e UNMIK-ut, i cili tha se po shpenzon miliona euro në Kosovë.
Ajo ka përshëndetur miratimin e projektligjit për demarkacionin me Malin e Zi, derisa ka thënë se dialogu mes Kosovës e Serbisë është e vetmja zgjidhje për paqe dhe integrim.
Haley ka inkurajuar vendet që nuk e kanë njohur Kosovën që t’i bashkohen më shumë se 115 shteteve që e kanë njohur pavarësinë e saj.
Holanda mbështetë iniciativën amerikane
Ambasadori i Holandës pranë OKB-së, Karel von Osterom, ka mbështetur iniciativën amerikane për ndryshimin e formatit të mbajtjes së seancave të Këshillit të Sigurimit për Kosovën.
Ai gjatë fjalimit në seancën e sotme në New York, ku po diskutohet raporti i rregullt tremujor i sekretarit të përgjithshëm të OKB-së, tha se vendi i tij përshëndet ratifikimin e marrëveshjes për demarkacionin me Malin e Zi në Kuvendin e Kosovës.
Safronkov: Arrestimi i Gjuriçit, “provokim mizor”
Diplomati rus pranë OKB-së, Vladimir Safronkov, tha se situata në Kosovë “nuk po shkon drejt zgjidhjes, por po përkeqësohet”.
Ai gjatë fjalimit të tij në seancën e sotme të Këshillit të Sigurimit të OKB-së, tha se EULEX po përgatitet të largohet nga Kosova dhe se nuk ka përparim në zbardhjen e vrasjes së liderit serb Oliver Ivanoviç.
“Përfaqësuesit e Prishtinës pa sukses tentuan që fajin për këtë ta bartin në Beograd”, tha Safronkov ndërkaq ka dënuar arrestimin e shefit të ashtuquajturës Zyrë për Kosovën, Marko Gjuriç, i cili kishte hyrë pa leje në Kosovë, duke e quajtur aksionin e njësive speciale “provokim mizor”.
Kina kundër ndryshimit të mandatit të UNMIK-ut
Zv/ambasadori kinez pranë OKB-së, Vu Haitao, tha se Kina i kundërvihet mandatit të seancave për UNMIK-un ose ndërrimin e formatit, në të cilin Këshilli i Sigurimit njoftohet me zhvillimin e situatës në Kosovë dhe se vendi i tij mbështet sovranitetin dhe integritetin territorial të Serbisë.
Ndërsa, përfaqësuesja e Francës në OKB ka thënë se Kosova dhe Serbia duhet të përmbahen nga çdo deklaratë që çon në tensionime, duke kërkuar përkushtim më të madh të Serbisë dhe Kosovës në procesin e dialogut me ndërmjetësimin e BE-së.
Ajo gjatë fjalës në seancën e sotme të Këshillit të Sigurimit për Kosovën tha se strategjia për Ballkanin Perëndimor e votuar më 16 shkurt nga BE-ja, tregon përkushtimin evropian për perspektivën evropiane të këtij rajoni.
Diplomatja franceze ka kërkuar angazhim më të madh në luftën kundër krimit dhe korrupsionit, ndërsa ka përshëndetur ratifikimin e demarkacionit me Malin e Zi.
“Ne kemi qenë gjithmonë krah për krah me Kosovën. Ne ftojmë autoritetet e Kosovës të vazhdojnë me zhvillimin e vendit dhe ftojmë subjektet politike të krijojnë konsensus për çështje të vendit”, është shprehur ajo.
