Kush nuk është kandidat për deputet i PD!

Sot kur Koordinatorët dhe intrigantët e tjerë si dyshja e famshme e çadrës Duma-Salianji nuk mund ta bëjnë më çorapë listën e kandidatëve për deputetë dhe kryetar të bashkive nga Partia Demokratike por është lënë në duart e anëtarësisë, Komisioni i Vlerësimit të Kandidatëve është përballur me emra që vazhdojnë dhe qarkullojnë në tregun politik ndonëse kanë dështuar me sukses si në vitin 2013 ashtu dhe në vitin 2017; Kjo vendosmëri e tyre bëri që shumë nga fytyra të reja ose anëtar të Forumit Rinor të mos zënë vend as në propozimet nga anëtarësia që pritet të jetë shqetësim dhe në vëmendje të veçantë të Kryetarit të PD, Lulzim Basha.

Ky kujdes vjen edhe sot pas tetë vjet qeverisjeje të dështuar të Edi Ramës kur dihet se në zgjedhjet parlamentare të vitit  2017 nga 1.613.960 ose  46.77 për qind e shqiptarëve që votuan, Partisë Socialiste me lekë dhe trafikantë të drogave, votën i dhanë 764.791 ose 48,34 për qind, që Opozitës së Bashkuar i jep fitoren e sigurt duke mos marrë parasysh as sondazhet e fundit që PD e nxjerrin të parën dhe Kryeministri Rama i hedhin poshtë si abuzive.

Kandidatë nga anëtarësia

Në korrikun e vitit 2019 kur u publikuan emrat e Koordinatorëve të Partisë Demokratike pati reagime si brenda ashtu dhe jashtë partisë ndërsa projektohej një vit zgjedhor, ku autoriteti i krijuar i këtij Koordinatori nxiti dhe një debat më  të zëshëm por pjesë e debatit nuk u bënë detyrat organizative dhe ato të strukturave lokale.  

Gjithsesi urdhri i Kryetarit të PD për plotësimin e strukturave drejtuese në çdo degë duke afruar persona me kontribute historike në parti, si dhe afrimin e grave dhe të rinjve, dha një rezultat që kërkonte dhe një hap para për të sjellë risi dhe një parti ndryshe të partisë pas 7 vjetësh të kaluar në opozitë.

Projekti i ri që ofroi Kryetari i Partisë Demokratike, Lulzim Basha, me përzgjedhjen e kandidatëve nga anëtarësia, i uli kokën Koordinatorëve që të punojnë për detyrat e dhëna dhe jo “hartimin e listave”, por modeli i konservatorëve britanikë, të cilët kanë asistuar PD së bashku me republikanët amerikanë dhe CDU e Angela Merkel, nuk ka për qëllim të cenoj demokracinë duke ndaluar edhe ata që vazhdojnë dhe mendojnë se janë të dinjitetshëm për deputetë ndonëse kanë dështuar në garat e kaluara politike.

Në këtë mes, intrigantët jo se u shuan madje ata u hodhën edhe në sulm duke bërë përpjekje për të minuar procesin e përzgjedhjes së kandidatëve nga anëtarësia, përmes mediave që i kishin furnizuar në të kaluarën me “lajme ekskluzive”! Ndonëse është shumë larg nga hartimi i listave me kandidatë potencialë për deputetë, në media përfunduan lista nga më të ndryshmet, sot kur dihen me siguri vetëm emrat e shumë prej atyre që janë propozuar por nuk do të jenë kandidatë për zgjedhjet parlamentare të vitit 2021.

Fillimisht për koordinatorët të cilët në traditën e PD ishin kandidatë për deputetë përveç se “tregtar” të futjes në lista. Bazuar në performancën e tyre të dobët si dhe koalicionit me Opozitën e Bashkuara dhe jo siç po lançohet me praninë e Genc Rulit dhe Besnik Mustafajt në Komisionin e Vlerësimit, mësohet se ata që nuk do të jenë në lista ose në zonën e sigurt të fitores janë: Hekuran Hoxhalli, Aldo Bumçi, Edmond Spaho, Gent Strazimiri, Bujar Vukaj, Arben Ibro, Bernard Banushi, Ervin Minarolli, Ilir Dervishi, Ahmet Premçi, Taulant Zeneli, Ervin Salianji dhe Kreshnik Çollaku. 

Nga performanca tek Opozita e Bashkuar

Performanca e dobët, kuota e femrave ose lista e Opozitës së Bashkuar pritet të penalizoj Astrit Veliajn dhe Bujar Hoxhajn nga Berati, si dhe të shuaj ëndrrën revolucionare të Lefter Maliqit me Ilir Metën dhe LSI-në. Pas abuzimit tradicional me këtë qytet, kandidatët e PD nga Berati do të jenë një risi shumë më e madhe se sa “përzgjedhja e kandidatëve nga anëtarësia”.  

Dibra ndonëse kishte shumë të interesuar nuk do ta ketë deputet Xhemal Gjunkshin dhe Agron Qokun, dhe për fat të keq në pikëpyetje ngelet dhe Jeton Kaloshi i cili penalizohet nga kuota e femrave dhe në veçanti koalicioni.     

Bazuar në rezultatet katastrofike dhe performancën shumë të dobët sot risitë janë të shumëta nga Durrësi. Me Oerd Bylykbashin durrsakët duhet të pajtohen pavarësisht qëndrimit që kanë, Fatbardha Kadiu është në pikëpyetje ashtu si dhe Edi Paloka i cili mendohet të futet në garë në kryeqytet. Ndërkohë ata që janë irrituar për Ferdinand Xhaferrin të rrinë të qetë, sepse ai nuk është pjesë e kalkulimeve demokrate ashtu si dhe Aulon Kalaja dhe Igli Cara, përkundër sforcimit të madh për kandidim. Përveç Agron Dukës që vjen nga koalicioni risitë do të jenë të këndshme për demokratët e Durrësit.

Në Elbasan do vijnë kohë më të mira për ata që ishin dhe janë demokratë! Hatërmbetjet mund të shkojnë në harresë, ndoshta nuk do të mjaftohen që Edmond Spaho dhe Taulant Zeneli nuk do të jenë më deputetë të PD, ashtu si dhe Arben Elezi që u përfol aq shumë për zgjedhjet e vitit 2017, por risitë e listës do të bëjnë që demokratët e Elbasanit të mendojnë ndryshe.

E sigurt është se Genc Pollo nuk do të jetë deputet i Fierit ashtu si Olsi Cukaj dhe Dilaver Kamberaj përkundër sforcimit të madhe për kandidim  ndërkohë po mendohet dhe nuk është vendosur për Pandeli Tolen dhe Ivi Kason. Risitë vijnë nga jeta publike ndërkohë “deformimi” i listës pritet të ndodhë nga Aleatët e Opozitës së Bashkuar, për të cilët vetëm PD dhe procesi i saj i përzgjedhjes nuk kanë faj!  

Gjirokastra mund të trazoj ca ujëra për shkak të prezencës së Genc Rulit në Komision e Vlerësimit, por nuk është ai, janë Aleatët që do të cenojnë vërtetë pozicionin në listë edhe të atyre që sot e quajnë veten të sigurt. Kryetari i PD Dega Gjirokastër, Dasho Aliko është e sigurt që nuk do të jetë kandidat i Partisë Demokratike ndërkohë burime nga PD theksojnë se janë në dyshim si Tritan Shehu ashtu dhe Roland Bejko. Risitë nga jeta akademike e Gjirokastrës me të cilët po negociohet pritet të sjellin një rifreskim të listës e cila gjithmonë kontestohej nga baza.

Kryetari i ri i PD Dega Korçë, Devis Osmani dhe spostimi i Andrea Manos si kandidat për deputet ka ulur shumë gjakra demokrat të këtij qyteti, por mosprania e Valentina Dukës, Ervin Salianjit dhe Hekuran Hoxhallit do të ndryshoj edhe më shumë hartën elektorale të këtij qyteti i cili do të përfaqësohet me më meritorët. A do të ketë të pakënaqur?! Këtë nuk e përjashton njeri duke pasur parasysh dhe kandidimin e Aelatëve!   

Mësohet se Kukësi është pak më i qetë me kandidurat jo vetëm pse në krye të listës nuk do ta kenë Flamur Nokën dhe aty nuk do të jetë Aleksandër Biberaj, por që më në fund është baza e anëtarësisë që do ta vendos njeriun e vetë. Për shkak të ndarjes territoriale, këtij qarku që ishte më aktivi për shkak  të terrorit të Edi Ramës për tetë vjet, do ti duhet të pajtohet me listën e kompromisit për shkak të Aleatëve që do të ndikojnë edhe hartimin e renditjes në listë.

Lezha i është nënshtruar një terrori mediatik edhe sot kur Komisioni i Vlerësimit të Kandidaturave vazhdon punën, por një gjë është e sigurt dhe lezhjanët duhet të jenë të qetë: Aldo Bumçi, Preç Zogaj dhe Agron Gjekmarkaj nuk do të jenë në listën e demokratëve pavarësisht se si do të rrjedhin negociatat me Aleatët.

Shkodra është paksa më e qartë ndonëse kryetari i ri i PD, Xhevdet Amuli, nuk është se sjelli freski në Partisë Demokratike. E sigurt është se Lorenc Luka, Gjokë Uldedaj dhe Ramiz Çobaj përkundër sforcimit të madh për të kandiduar si dhe angazhimit mediatik, nuk do të jenë kandidat për deputet. Për këtë të fundit dihet madje se ishte bashkëpunëtor i Sigurimit, denoncim të cilin PaFrikë e ka bërë që në dhjetorin e vitit 2018. 

Tirana është një kapitull i pambyllur ndërsa vazhdon sita e kandidatëve, por e sigurt është se Gent Strazimiri dhe Gert Bogdani nuk do të jenë kandidatë për deputetë; Prezenca e Sali Berishë në këtë listë nuk është e sigurt meqë pritet dhe vendimi i tij, ndërsa Grida Shqima mund të përfitoj vetëm nga kuota për femra ndryshe ajo nuk është projektuar në këtë listë. Bota akademike dhe Forumi Rinor pritet të sjellin risi në zonën e sigurt të kësaj liste për çfarë vazhdojnë dhe konsultimet.

Më në fund demokratët e Vlorës mund të qetësohen pavarësisht turbullirave  që përjetuan. E sigurt është se nuk do të votojnë për Arben Ristanin madje as për Bujar Leskajn i cili në momentet e fundit iu imponua vlonjatve për kandidim si nga strukturat ashtu dhe lançimi mediatik.  

Në fund, mund të themi se është diskutuar shumë gjatë vendimmarrjes se kush nuk do të jetë kandidat për deputet! Por, pas vendimit të Kryetarit të PD, Lulzim Basha, për largimin e Jozefina Topallit, Eduart Selamit, Majlinda Bregut, Astrit Patozit, Arben Imamit, Ridvan Bode e Myqerem Tafajt, gjithsesi vendimi për një listë fituese të zgjedhjeve parlamentare për vitin 2021, është shumë më e lehtë.

Dhe, pa kandidatë të tillë nuk e ka më të lehtë vetëm Partia Demokratike por të gjithë shqiptarët që janë të vendosur dhe vazhdojnë të jetojnë në atdheun e tyre  duke përsëritur:

Shqipëri s’të kam dhjerë, por me deputetë të tillë nuk të desha asnjëherë!