Mbi 180 kriminelë shqiptarë strehohen në Shqipëri, ja për çfarë kërkohen

Mbi 180 kriminelë shqiptarë që kërkohen për krime të rënda në Greqi, po stehohen në Shqipëri. Lajmi është botuar në të përditshmen “Kathimerini”, e cila i referohet burimeve policore. Sipas artikullit, bëhet fjalë për krime të kryera gjatë 18 viteve të fundit.

Konkretisht, autoritetet greke kanë lëshuar 184 urdhër-arreste për qytetarë shqiptarë të akuzuar për vepra të ndryshme penale që prej vitit 2000.

Asnjë prej tyre nuk është kapur. Sipas policisë greke, shqiptarët e kërkuar për krime në Greqi janë arratisur dhe fshihen në Shqipëri. Gjatë këtij viti janë lëshuar urdhër-arreste ndërkombëtare për 14 shqiptarë, ndërsa në vitin 2017 u lëshuan 21 mandate kërkimi dhe 26 për vitin 2016.

Zyrtarë të lartë të Policisë Greke kanë thënë për Kathimerini se asnjë prej shqiptarëve të kërkuar nuk është ekstraduar në Greqi, me pretendimin se hasin në vështirësi nga autoritetet shqiptare.

“Në rastet kur kërkojmë ekstradimin e të dyshuarve, pala shqiptare na kërkon të dërgojmë shkresat të përkthyera në gjuhën shqipe në mënyrë që ata të mos ekstradohen në Greqi por të përballen me gjyqin në Shqipëri”, tha një burim policor për “Kathimerini”.