Mesazhi i Azem Hajdarit më kumbues se kurrë, Noka: Regjimi kërkon përballje dhe luftë që ta rrëzosh

Mesazhi i Azem Hajdarit është më kumbues se kurrë. Regjimi do kurajo, regjimi do përballje, regjimi do t’i qëndrosh, regjimi do që të luftosh ta rrëzosh, , tha Sekretari i Partisë Demokratike, Flamur Noka, pas homazheve te Memoriali i Azem Hajdarit, në përkujtim të 26 vjetorit të rënies së Heroit të Demokracisë.

“Azem Hajdari hyri në histori me trimërinë, me guximin dhe kurajën që tregoi për t’u përballur me diktaturën.

Azem Hajdari me studentët u përballën dhe sfiduan regjimin me gjaktar që ka pasur Shqipëria.

Ata dhanë një mesazh se vetëm guximi, përballja dhe kurajoja është rruga e duhur kur ke përballë një regjim, një regjim që kundërshtarëve iu tundte prangat ose plumbin,” tha Flamur Noka duke shtuar se mesazhi i Azem Hajdarit sot është më adekuat se kurrë:

“Në atë kohë ishte një regjim politik bolshevik, sot kemi një regjim më të egër, një narkoregjim, një regjim të krimit dhe bandave,” vlerësoi Sekretari i Partisë Demokratike, Flamur Noka, pas homazheve te Memoriali i Azem Hajdarit, duke përfunduar:

“Sot shqiptarët nga ky përkujtim, këtë mesazh kanë. Të ngrihemi, të përballemi dhe të rrëzojmë narkoregjimin që është edhe më i egër se regjimi bolshevik.”