Opozita bllokon edhe Komisionin e Ekonomisë: Të dorëhiqet Xhafaj!

Opozita ka bllokuar edhe Komisionin e Ekonomisë duke kërkuar dorëheqjen e ministrit të Brendshëm, Fatmir Xhafajt.

Kryetari i Komisionit, Erion Braçe ka tentuar të vendosë rregull dhe të shmangë aksionin e opozitës, por Kryetari i Grupit të PD, Edmond Spaho dhe deputetët e opozitës janë vendosur përballë mazhorancës në shenjë proteste.

“Unë u kërkoj ndjesë përfaqësuesve të institucioneve financiare këtu. Kam respektin më të madh për ta. Janë kolegë të nderuar, profesionistë, me disa prej tyre kemi punuar. Nuk ka të bëjë fare qëndrimi që po mbajmë këtu, ne kemi respekt dhe do të vazhdojmë të bashkëpunojmë me ta,” tha kreu I grupit të PD duek arsyetuar veprimin opozitar dhe shtoi:

“Por vendi ndodhet në një gjendje të tillë që nuk mund të rrimë indiferentë dhe të hiqemi sikur Kuvendi i Shqipërisë ndodhet në situatë normale. Nuk ndodhet në situatë normale. Prej disa ditësh ne kemi denoncuar një skandal shumë të madh: përfshirjen e ministrit të Brendshëm në trafikun e drogës. Sapo u shkarkua dhe gjoja u bë në arrest shtëpie, Ish-ministri i Brendshëm, hapet një histori me ministrin tjetër të Brendshëm. Nuk di ndonjë vend tjetër në botë që të ketë kaluar në faza të tilla,” tha Spaho.

Derisa deputetët e PD dhe LSI vazhduan të qendrojnë para tij, Braçe filloi të shes leksione morali.

“Jam shumë i sigurtë që duhet të funksionojë shteti, dhe nuk është një parti politike që jep vendime. Deputeti vendosej të pushkatohej dhe pastaj ai pushkatohej vetë.”

Ndërhyrjet nga opozita për të lënë këto fraza nuk i pëlqyen Braçe, dhe tashmë në mazhorancë u kujtua se ky shtet ka edhe institucione.

“A ka mundësi të mbaroj unë?! Institucionet duhet të veprojnë,” tha Braçe por bllokimi vazhdoi.