Pakti me Taulant Ballën, Boçi: Alibeaj nuk na përfaqëson, tallje me zgjedhjen e Presidentit!
Enkelejd Alibeaj nuk përfaqëson opozitën dhe s’mund të ulet në tryezë diskutimesh. Kështu u shpreh anëtari i Komisonit Rithemelimit dhe deputeti i PD, Luçiano Boçi, duke reaguar pas marrëveshjes që arriti grupi i deputetëve të Lulzim Bashës të kryesuar nga Enkelejd Alibeaj me Kryetarin e Grupit Parlamentar të PS, Taulant Balla, duke shtuar se mazhoranca po tallet me procesin e zgjedhjes së Presidentit
“Pranimi është fals. Është pranim i kufizuar. Pranimi që ka kërkuar zoti Berisha është sipas detyrimit kushtetues për pranim juridik. Pozicioni përzgjedhës, meqenëse mazhoranca ka votat, i takon mazhorancës. Rezoluta e miratuar në Këshillin Kombëtar, e tregon këtë. Tallja me tre raunde, i takon gjoja opozitës, por meqenëse lihet opsioni që do të ketë raund të 4 dhe të 5 i bie që rrëzohet kërkesa e opozitës.
Pse duhet të krijojmë një proces të tillë tallës. Qëllimi ynë ka qenë të bëjmë një proces me dy drejtime, për zgjedhjen e presidentit dhe për të bashkuar PD. Ne do të shohim qëndrimet tona në rpaort me emrin. Një emër që vjen jashtë parimeve Kushtetuese, se ka besimin. Emri i mirë duhet të shkojë në harmoni të plotë me veprim Kushtetutës të mirë. Nuk mund të prevalojë Kushtetuta mbi emrin,” tha Boçi duke theksuar edhe me këtë rast se zoti Alibeaj nuk ka tagër, të drejtë, të jetë përfaqësuesi i opozitës.
“Ai mund të jetë deputet i thjeshtë dhe e ka mbaruar misionin e tij si kryetar i Grupit Parlamentar të PD. Nuk bëhet fjalë për reformë zgjedhore. Nuk mund të vazhdohet me këtë formë. Ndoshta Alibeaj mbrohet me pozicionin e Kryetarit të komanduar, por atë s’ia siguron dhe Rama. E tall aq shumë, i çon Ballën që realizon negociatë me atë që ai do dhe ai është Alibeaj. Rama anashkalon Partinë Demokratike. I vesh atribute dhe i tall me një fazë tjetër, duke thënë që ai ka të drejtë që i rrëzon ato. Tryeza nuk ka vlerë në kuadër parlamentar, duhet të jetë në nivel politik.”
Në fund, anëtari i Komisonit Rithemelimit dhe deputeti i PD, Luçiano Boçi, tha se do të vazhdojnë në drejtimin për të bashkuar Partinë Demokratike duke i dhënë fund keqpërdorimit të Grupit Parlamentar të PD ndërsa përfundoi.
“Po e tërheqin zvarrë. Me anëtarët e Grupit Parlamentar, Enkelejd Alibeaj flet nëpërmjet emailit, ndërsa me Taulant Ballën takohet ballë për ballë e përqafohen në tavolinë!”
Ndryshe, pas një debati të stërgjatur dhe bosh, sot Kryetari i Grupit Parlamentar të PS, Taulant Balla, i pranoi pa kushte kriteret për zgjedhjen e Presidentit të Republikës që u propozuan nga deputetët e Lulzim Bashës ndonëse nuk janë pranuar nga Grupi Parlamentar i PD, deri në raundin e tretë ku socialistët nuk do të bëjnë as propozime për Presidentin dhe do presin ato të opozitës ndërsa për raundin e katërt dhe të pestë Taulanti tha se fletë Kushtetuta.
