Politika dhe Krimi/ Kërkesë për mocion, Grupi i PD: U konfirmua, të dhënat e TIMS janë fshirë!
Pas Investigimit të RAI 3, gjetjeve të Komisionit Hetimor për sistemin TIMS si dhe përagtijeve për protestën e nesërme para Parlamentit të Shqipërisë, me përfundimin e mbledhjes së Grupit Parlamentar të Partisë Demokratike, kreu i saj Gazment Bardhi tha se është depozituar një kërkesë për mocion me debat mbi lidhjet e politikës me krimin.
Ndërkohë është konfirmuar në Komisionin Hetimor se të dhënat nga sistemi TIMS janë fshirë për llogari të krimit të organizuar, për protestën e nesërme në orën 10:00, Grupi Parlamentar i PD kishte një apel yë veçantë, sot kur një qeveri e një vendi anëtar të NATO-s miraton ligje dhe fuqizon grupe kriminale.
“Të hënën grupi parlamentar i PD ka depozituar një kërkesë për mocion me debat mbi lidhjet e politikës me krimit. 2013-2017 grupi ynë denoncoi individë me rekorde kriminal ë me mbështetjen e Ramës dhe PS ia kishin dalë të penetronin në nivelet më të larta të shtetit duke u zgjedhur deputetë apo kryetarë bashkie.
Si rezultat i qëndrimit të grupit të PD, edhe pse në mënyrë të vijueshme Rama i konsideronte baltë qëndrimet tona, Kuvendi miratoi ligjin unik në botë që garantonte integritetin për personat që ushtronin funksione publike.
Ekzaktësisht njëlloj si sot Rama tallej me denoncimet e opozitës apo mediave ndërkombëtare, madje tha se me zor priste hyrjen në fuqi të ligjit për të identifikuar kriminelët sepse opozita sipas tij gënjente.
E vërteta është se Rama kishte hapur dyert për persona me rekorde kriminale,” tha Gazment Bardhi.
Për zhvillimet e fundit në Komisionin Hetimor për sistemin TIMS, Kryetari i Grupit Parlamentar të PD-së, sqaroi:
“Ajo që ka thënë opozita, që sistemi TIMS keqpërdoret duke fshirë, plotësuar, e shtuar dhe ndryshuar të dhëna për llogari të krimit të organizuar, është konfirmuar dje në komisionin e TIMS. Prandaj duan të mbyllin dyert e komisionit, sepse kanë përdorur një sistem të sigurisë kombëtare për ti shërbyer grupeve kriminale.
Kanë fshirë të dhëna sipas interesit të tyre, që ata të kalojnë dhe të arratisen.
Dhe kur të nxjerrë urdhër më pas SPAK, ata të gjenden në Dubai apo në vende ku ekstradimi bëhet i vështirë.
Kjo është qeveria e Edi Ramës, është projekt politik. Edi Rama ka ardhur në pushtet me krimin e organizuar dhe më pas kërkon aleancë me to, i keqpërdor në zgjedhje, i vendos përballë qytetarëve dhe më pas vendos qeverinë në funksion të tyre,” tha Bardhi duke kërkuar që Prokuroria e Posaçme të vijojë punën në luftë ndaj krimit të organizuar.
“SPAK të veprojë shpejt për lidhjen mes politikës e krimit. Opozita pret që SPAK të përmbushë misionin për të goditur krimin e organizuar e të mbajë përgjegjësi politikanë t që prej 11 vitesh dhunojnë çdo proces zgjedhor, me ndihmën e krimit të organizuar.”
Në fund, Kryetari i Grupit Parlamentar të Partisë Demokratike, Gazment Bardhi, i bëri thirrje Kryetares së Parlamentit të respektoj Kushtetutën dhe të caktoj kohën për debat ndërsa një Apel të veçantë kishte për qytetarët:
“Në emër të Grupit të PD i bëj thirrje Nikollës të respektojë Kushtetutën e Rregulloren. Kërkesa për mocion me debat, duhet të ishin mbledhur sot Konferenca e Kryetarëve për të caktuar kohën për debat. Nëse mendon se do t’ia hedhë me injorim të kërkesën, kjo do ishte e pranueshme për grupin tonë.
Apeloj çdo qytetar të marrë pjesë në protestën e orës 10:00 duke shprehur vendosmërinë se nuk pajtohemi me faktin që një qeveri e një vendi anëtar të NATO-s të miratojë ligje e të fuqizojë grupe kriminale.”
