Rusia sulmon centralin më të madh bërthamor në Evropë

Në orët e para të 4 marsit, zyrtarët në Ukrainë kanë raportuar se forcat ruse kanë bombarduar një central bërthamor në Zaporizhzhia të Ukrainës. Ky është centrali bërthamor më i madhi në Evropë.

Duke konfirmuar zjarrin, ministri i jashtëm i Ukrainës, Dmytro Kuleba, tha përmes rrjetit social Twitter se ushtria ruse “po qëllon nga të gjitha anët” në kompleksin e këtij centrali bërthamore.

Kuleba, raporton RFE, bëri thirrje për një ndërprerje të menjëhershme të sulmit rus për t’iu lënë zjarrfikëseve hapësirë për të shuar zjarrin ndërsa paralajmëroi se një katastrofë atje mund të ishte më e keqe se ajo e Çernobilit që ndodhi në vitin 1986.

Pas raportimeve për zjarr në këtë central bërthamor, Agjencia Ndërkombëtare e Energjisë Atomike tha se është në kontakt me autoritetet ukrainase.

Kjo agjenci ka shkruar në një postim në Twitter se “është në dijeni të raportimeve për granatimet në centralin bërthamor Zaporizhzhia” dhe se ishte në kontakt me autoritetet ukrainase për situatën.

Pas publikimit të lajmit, raporton RFE, presidenti i SHBA-së, Joe Biden, po ashtu ka telefonuar presidentin e Ukrainës, Volodymyr Zelensky.

Shtëpia e Bardhë ka thënë se është duke monitoruar situatën pas shpërthimit të zjarrit në këtë central bërthamor.