Saimir Tahiri e fitoi Eurovisionin 2018!

Rrufiste kafenë poshtë shtëpisë derisa mediat po raportonin se Ish-ministri i Brendshëm, Saimir Tahiri, i akuzuar për trafik ndërkombëtar droge po e pret me ankth vendimin e Gjykatës së Krimeve të Rënda për caktimin e një mase të re sigurie.

“Arrest shtëpie”, ky vendim qesharak i Gjykatës dëshmoi se Saimir Tahiri mund të ketë pasur ankth, por vetëm për Eurovisionin 2018, i cili pritej të fillonte pas rreth 180 minutash. Këtë e dëshmoi pas pak minutash edhe reagimi i shefit të tij:

“Vendimi i sotëm për Saimir Tahirin nuk komentohet, thjesht respektohet si një e drejtë e organeve të drejtësisë, të cilat i detyrohen vendit e botës një proces të pavarur, transparent e me integritet të plotë kushtetues e profesional, duke garantuar drejtësi jashtë çdo influence politike, mediatike a diplomatike,” tha Edi Rama, njeriu që qirrej pas çdo vendimi të Gjykatave që nuk i kishte “reformuar”, pavarësisht nëse bëhej fjalë për vrasje, prona, divorc apo shkelje të të drejtave të kafshëve. Dhe, nuk ka më S.T. e zgjidhi çështjen bossi i këtij vendi të kriminalizuar!

Meqë e ka urdhëruar vetë, ai s’ka pse e komenton, por ne dy fjalë duhet ti themi për këtë vendim të turpshëm të drejtësisë shqiptare, së cilës i ka vënë dorë “Reforma në Drejtësi”.

Kuksianët që i prishën traun Qetit, u prangosën nga drejtësia e reformuar e Edi Ramës; Dhe,  i akuzuari për Trafikim të narkotikëve, në bashkëpunim, në formën e grupit të strukturuar kriminal, parashikuar në nenet 283/a dhe 333/a, në lidhje me nenin 28 të Kodit Penal dhe, Korrupsion pasiv të funksionarëve të lartë shtetërorë ose i të zgjedhurve vendorë, i parashikuar në nenin 260 të Kodit Penal, lejohet të rrufisë kafen  ku ti dojë kokërra e qejfit e më pas të kapardiset në kolltukun e shtëpisë dhe ta shikoj Eurovisionin, pse jo. Pse të ketë ankth!

Kur ishte i gatshëm për të marrë në dorë edhe vendimin e madh i cili u urdhërua nga bossi i tij, prokurorët mbërritën në banesën e Saimir Tahirit dhe në prani edhe të avokatit Maks Haxhia, atij iu komunikua zyrtarisht vendimi, i thanë që nuk është më S.T, i morën pasaportën dhe kartën e  identitetit. “Urdhërohet shtetasi nën hetim Saimir Bashkim Tahiri të mos largohet nga banesa e tij, ndodhur në Tiranë, Rruga “Kodra e Diellit”, Pallati Nr.3”.

Ky urdhër i Gjykatës së Ramës do të mbahet mend në analet e gjyqësorit shqiptar, si këtij të reformuarit ashtu edhe atij zhele, i cili u degradua nga komunistët shqiptarë dhe nuk po shpëtojmë dot si ne që nuk mendojmë si Edi Rama ashtu edhe ata që mendojnë si Ish-S.T.

Buçitën pak sa mediat dhe rrjetet sociale për vendimin dhe gjykatësja, Liliana Baku e Gjykatës së Krimeve të Rënda, e cila ishte e gatshme për masat e sigurisë që mund të paraqiteshin, dhe u mor me vendimin më të rëndësishëm të këtij pesëvjeçari qeverisës të kanabizimit të Shqipërisë, me vetttingun e kaluar, vazhdoi rrugën për në shtëpi, për të bërë tifo për Eugen Bushpepën.

Kur gjykatësja Baku tashmë ishte me një barrë më pakë në kokën e saj, prokurorëve Besim Hajdarmataj, Elisabeta Imeraj dhe Gentjan Osmani që kishin marrë në pyetje për dosjen “Tahiri – Habilaj”, shoferët e Tahirit, badiguardindhe Orest Sotën, nuk u ngeli asgjë tjetër vetëm se të kapardisen edhe ata si bossi i S.T. për të shikuar Eurovisionin 2018.

Për pak çaste gjithçka kaloi në harresë. Madje edhe ato pak insinuata që “arsyetonin” këtë vendim të gjykatës, me faktin se Saimir Tahiri nuk është i sigurt në burg dhe i është dhënë kjo masë, meqë lehtësisht mund të bëhet dëshmitar bashkëpuntor i këtij proçesi! Shqiptarët vazhduan diskutimin për Eurovisionin 2018 që sapo filloi, dhe çështja kriminale Tahiri u zbehë aq sa edhe qindëra mijëra shqiptarë të vrarë nga dora e Enver Hoxhës, që sot nga historianët  e Edi Ramës quhen, njerëz të mirëtrajtuar në Kampin e Tepelenës!

Në momentin kur filloi proçesi i vlerësimit të këngëve, çuditërisht dora e Saimir Tahirit futet edhe në Eurovision. Nuk bëhej fjalë më nëse duhet vlerësuar me më shumë pikë, Eugen Bushpepa, Ermal Meta apo Eleni Foureira, por pse Italisë iu dhanë 12 pikë, dhe ajo nuk i dha Shqipërisë as edhe një!

Gojët e liga filluan të flasin për S.T. jo se kishte bërë qokë por ishte hakmarr ndaj Greqisë që i zbuloi të palarat e Ish-ministrit të Brendshëm në kufi. Dhe, ashtu ndodhi, Italia ngeli aty ku ishte, shumë larg vendit të parë, Qiproja ngeli në vendin e dytë, e me Eugenin asgjë nuk e lidhë S.T. sepse Eugen Bushpepa e do vendin e tij.

Ç’ti bësh, kjo është Shqipëria, kuksianët vazhdojnë të jenë në burg se prishën traun e Qetit, ai që kanabizoi gjithë Shqipërinë mori edhe Gjykatat nën kontroll, ndërsa Saimir Tahiri ndryshoi paksa vendin e rrufitjes së kafesë, nga ballkoni i kafenesë në atë të apartamentit, ama nuk ndryshoi adresë: në Kodrën e Diellit. Aty ku po feston zemërimin grek për humbjen e shqiptares Eleni Foureira!