Tërmet në Afganistan, mbi 1000 të vdekur dhe 1500 të plagosur

Në tërmetin e fuqishëm i cili goditi Afganistanin në orët e para të mëngjesit kanë mbetur të vdekur mbi 1.000 persona ndërsa janë plagosur mbi 1.500 vetëm në krahinën Paktika dhe pritet që ky numër të rritet, theksojnë autoritetet lokale.

Drejtori për informim dhe kulturë në këtë krahinë, Mohammad Amin Huzifa, tha se këto shifra vijnë nga pjesët e kësaj krahine, Gayan dhe Barmal, ndërsa operacionet e kërkim-shpëtimit vazhdojnë, që do të thotë se edhe shifrat e tragjedisë mund të rriten

Përveç se në krahinën Paktika, edhe në krahinën Kost ka 25 të vdekur dhe 90 të plagosur, tragjedi kjo që vjen pas përmbytjeve në shumë rajone ku sipas Agjencisë për menaxhimin e katastrofave kanë mbetur të vdekur 11 persona, janë plagosur 50 dhe shumë prej akseve rrugore vazhdojnë të jenë të bllokuara.

Ndryshe, tërmeti ishte me magnitudë 6.1 të shkallës Richter, e tërmeti ka goditur zonat më të banuara të Afganistanit dhe Pakistanit, ka raportuar Enti gjeologjik amerikan, USGS.

Për herë të fundit, Afganistan është goditur nga një tërmet i përmasave të tilla më 25 Mars të vitit 2002 kur në Hindu Kush humbën jetën 1.000 persona.