Tetovë, arrestohen dy persona me 1 kg marijuanë dhe 1 shishe kokainë

Efektivët e policisë, nga Sektori për punë të brendëshme Tetovë, në rrugën lokale Shemshovë-Zhilcë, në fshatin Shemshovë të Tetovës, kanë ndaluar dy makina me targa të Tetovës, Folcvagen Passat e drejtuar nga F.N 53 vjeç, dhe  Opel Astra e drejtuar nga H.B 55 vjeç, që të dy nga Tetova.

Gjatë kontrollit të makinës dhe shoferit të Opel Astra, mbrapa sediles së tij, është gjetur rreth një kilogram marijuanë, derisa gjatë bastisjes në shtëpinë e F.N.  realizuar më vonë me urdhër të gjykatësit, është gjetur një shishe plastike, në të cilën kishte substancë të bardhë pluhuri, ku dyshohet se bëhet fjalë për kokainë, raporton TV Shenja.

Gjithëçka që është gjetur është dokumentuar me foto dhe është marr për ekspertizë, derisa në koordinim me prokurorin publik, dy personat F.N. dhe H.B. janë privuar nga liria dhe janë mbajtur në komisariatin e policisë në Tetovë, për procedim të mëtejmë.