Presidentja e KE: BE, 145 mijë vaksina Pfizer për Shqipërinë, 95 mijë për Kosovën

Presidentja e Komisionit Europian, Ursula Von Der Leyen, ka bërë të ditur se në muajin maj, Bashkimi Europian fillon shpërndarjen e vaksinave Pfizer në Ballkanin Perëndimor, ku për Shqipërinë janë parashikuar 145 mijë vaksina ndërsa për Kosovën 95 mijë.

“Ne jemi pranë partnerëve tanë në Ballkanin Perëndimor, siç i thashë edhe Edi Rames. 145.000 doza vaksinash të financuara nga BE do të jenë në Shqipëri duke nisur nga maji deri në fund të gushtit. Jemi së bashku në këtë betejë,” thekson Von Der Leyen përmes rrjetit social Twitter.

Njoftimin në gjuhën shqipe përmes rrjetit social Twitter, Presidentja e Komisionit Europian e ka bërë edhe për Kosovën:

“Qëndrojmë përkrah partnerëve tanë në Ballkanin Perëndimor, siç i thashë edhe 95.000 doza të vaksinave të financuara nga BE-ja do të arrijnë në Kosovë që nga muaji maj e deri në fund të gushtit. Ne jemi në këtë betejë së bashku.”

 Ndryshe, Austria si vend që koordinon dërgimin e vaksinave në Ballkanin Perëndimor, si pjesë e një mekanizmi të BE-së për ndarje të vaksinave, bëri të ditur se në Ballkanin Perëndimor do të dërgohen 651.000 doza të vaksinës kundër koronavirusit Pfizer/BioNTech. Autoritetet e Vjenës thanë se kjo dërgesë mund të pasohet edhe nga të tjerat.