Qeveria e Kosovës, edhe në Bosnje me letërnjoftim; Reagon PDK!

Qeveria e Kosovës ka miratuar nismën për lidhjen e marrëveshjes ndërkombëtare me Shqipërinë, Bosnje dhe Hercegovinën, Maqedoninë e Veriut, Malin të Zi dhe Serbinë. Por kjo marrëveshje u kritikua ashpër nga PDK.

Kjo marrëveshje, sipas Qeverisë së Kosovës, u mundëson qytetarëve të Kosovës dhe atyre të Bosnjës dhe Hercegovinës që për herë të parë të hyjnë në territorin e njëra-tjetrës me letërnjoftim biometrik për një periudhë të caktuar.

Ministri i Punëve të Brendshme, Xhelal Sveçla ka treguar për nismën e marrëveshjes në kuadër të Samitit të Sofias, për lidhjen e marrëveshjes për liri të lëvizjes.

“Kjo draft-marrëveshje është në frymën e interesave të përbashkëta. Përcakton kushtet e hyrjes, qëndrimit dhe lëvizjes. Qytetarëve të palëve të treta janë të gjithë personat të cilët nuk janë palë nënshkruese. Si rezultat i kësaj marrëveshje një qytetar i palës së tretë, do të kalojë kufirin në një palë në marrëveshje me një dokument”, ka theksuar Sveçla.

Qeveria e Kosovës ka miratuar edhe nismën për lidhjen e marrëveshjes për lirinë e lëvizjes dhe qëndrimit në këto shtete. Qytetarët do të kenë mundësi të lëvizjes vetëm me letërnjoftim biometrik.

Kreu i Partisë Demokratike të Kosovës, Enver Hoxhaj, duke e kritikuar ashpër këtë vendim tha se kur kishte nisur kjo iniciativë e cila Kosovën nuk e trajton barabartë me vendet tjera, Albin Kurti e kishte quajtur “Jugosllavi e re”.

“Kryeministri Albin Kurti ende pa e nisur zyrtarisht dialogun me Serbinë, sot paska marrë vendim për nisjen e zbatimit të mini-shengenit ku Kosova nuk trajtohet e barabartë me vendet e rajonit. Kohë më parë kur ishte në opozitë, këtë nismë rajonale Albini e quante Jugosllavi e re,” thekson Enver Hoxhaj në reagimin e tij përmes rrjetit social Facebook duke përfunduar:

“E pra tani me dorën e tij e nisi Jugosllavinë e re andaj urime Albin!”