Pas PD-së në zgjedhje , Ilir Meta dëmton edhe Sali Berishën në betejën e tij ligjore
Pasi dëmtoi Partinë Demokratike me deklaratat e tij histerike kundër Ambasadores së SHBA, Yuri Kim, duke u paraqitur edhe si lider opozitar vetëm 48 orë para zgjedhjeve të 25 Prillit, sot Presidenti i Republikës, Ilir Meta, i qëndron besnik linjës së tij bolshevike duke e cilësuar fletërrufe të porositur nga regjimi i kleptokracisë në Tiranë kundër z.Sali Berisha, Presidentit të parë demokratik të vendit, shpalljen NON GRATA nga Sekretari amerikan i Shtetit, Antony Blinken.
“Kjo ‘fletërrufe’ jo rastësisht u kërkua në këtë moment, kur procesi zgjedhor ende nuk është mbyllur zyrtarisht dhe kur institucionet, sipas Kodit Zgjedhor, duhet të shprehen lidhur me ankesat e shumta për manipulimet dhe krimet zgjedhore të denoncuara gjerësisht, që kanë cenuar rëndë standardet perëndimore të një procesi elektoral plotësisht të lirë, të ndershëm dhe demokratik,” tha Ilir Meta jo rastësisht duke dëmtuar betejën ligjore me Antony Blinken, që Sali Berisha e filloi në Gjykatën Korreksionale të Parisit duke i dhënë qëndrimit antiamerikan përmasa të një grupi të strukturuar kriminal që ka prodhuar politika shqiptare.
Dhe jo vetëm kaq! Intimitetin e këtij grupi, Ilir Meta e ngrit në nivele familjare, dhe për të treguar se sa i shqetësuar është për Sali Berishën ndonëse ishte ai që i vuri prangat kur ishte Kryeministër, përdor terma familjar që Familja Berisha vetëm me Metën dhe bandën e tij kriminale nuk kanë të bëjnë.
“Përshëndetjet e mia më të sinqerta dhe solidaritet për Ju, Lilin dhe Familjen tuaj pas këtij akti të shëmtuar, të pabesë dhe të poshtër, që ka të bëjë vetëm me lobingjet antishqiptare dhe asgjë tjetër. Ata që financuan për të shpallur hero të Reformës në Drejtësi Dvoranin e Partisë mund të bënin çdo marrëzi dhe nuk mund të na habisin më me pacipësinë e tyre për respektin ndaj shtetit të së drejtës dhe pavarësinë e Drejtësisë. Të fala!” tha Ilir Meta në reagimin e tij përmes rrjetit social Facebook duke “i ndihmuar” Sali Berishës me cilësimin e vendimit të Seketarit amerikan të Shtetit, akt të pabesë dhe të poshtër i cili është porositur nga regjimi i kleptokracisë në Tiranë, shërbëtor i së cilës vazhdon të jetë vetë.
Sa është reale beteja ligjore e Ish-Presidentit Sali Berisha do të konfirmohet nga vetë Berisha nëse distancohet nga ky llum i politikës shqiptare që bëri Kryeministër Edi Ramën dhe e shanë 26 nga 24 orë sa ka dita!
Ndryshe, lajmin se Ish-Presidenti i Shqipërisë, Sali Berisha, u shpall NON GRATA nga Departamenti amerikan i Shtetit e ka bërë publik, Sekretari amerikan i Shtetit, Antony Blinken.
“Akte korrupsioni të ish-Presidentit të Shqipërisë, Sali Berisha, minojnë demokracinë në Shqipëri. Unë shpall publikisht Sali Berishën dhe anëtarët e familjes së tij si të papërshtatshëm për hyrjen në Shtetet e Bashkuara,” thekson më 19 Maj përmes rrjetit social Twitter, Sekretari amerikan i Shtetit, Antony Blinken, duke përfunduar:
“Ne mbetemi bashkë kundër korrupsionit me partnerët tanë në Shqipëri!”
Statusi i plotë i Ilir Metës:
Të dashur qytetarë shqiptarë dhe bashkëkombas kudo në botë,
Si President i Republikës së Shqipërisë ndjej përgjegjësinë e lartë të ndaj me Ju vlerësimin tim lidhur me “fletërrufenë” e porositur nga regjimi i kleptokracisë në Tiranë kundër z.Sali Berisha, Presidentit të parë demokratik të vendit.
Kjo “fletërrufe” jo rastësisht u kërkua në këtë moment, kur procesi zgjedhor ende nuk është mbyllur zyrtarisht dhe kur institucionet, sipas Kodit Zgjedhor, duhet të shprehen lidhur me ankesat e shumta për manipulimet dhe krimet zgjedhore të denoncuara gjerësisht, që kanë cenuar rëndë standardet perëndimore të një procesi elektoral plotësisht të lirë, të ndershëm dhe demokratik.
Duke u bërë thirrje të gjithëve të zbatojnë me rigorozitet ligjin, si dhe të gjitha kërkesat e Kodit Zgjedhor lidhur me procesin e 25 prillit, pasi kjo është dhe mbetet çështja më e rëndësishme aktualisht, ndjej përgjegjësinë të ndaj me secilin prej jush, mesazhin e solidaritetit, që i kam dërguar z.Sali Berisha dhe familjes së Tij ditën e enjte paradite, pas informacioneve, që mora nga burime të ndryshme dhe të besueshme:
“Përshëndetjet e mia më të sinqerta dhe solidaritet për Ju, Lilin dhe Familjen tuaj pas këtij akti të shëmtuar, të pabesë dhe të poshtër, që ka të bëjë vetëm me lobingjet antishqiptare dhe asgjë tjetër. Ata që financuan për të shpallur hero të Reformës në Drejtësi Dvoranin e Partisë mund të bënin çdo marrëzi dhe nuk mund të na habisin më me pacipësinë e tyre për respektin ndaj shtetit të së drejtës dhe pavarësinë e Drejtësisë. Të fala!”
