Sali Berisha NON GRATA, reagon Rama: Rrugë të re në komunikimin publik!

E shndërroi politikën në telenovelë, përmes saj e lodhi dhe e përçau kombin në Ne dhe Ata, por sot shpikësi i saj, Kryeministri Edi Rama, kur u pyet për shpalljen e Ish-Presidentit Sali Berisha NON GRATA nga Departamenti i Shtetit, tha se do të çel një rrugë të re të komunikimit publik, duke shmangur të gjitha të tjerat që e kanë kthyer jetën politike të vendit në telenovelë rraspakitëse.

“Unë jam 100 përqind i fokusuar tek punët. Nuk e kemi ndalur asnjë ditë, gjatë dhe pas fushatës. Kjo sepse nuk ka kohë për pushim. Jam shumë i vendosur që ne të çelim një rrugë të re në aspektin e komunikimit publik, të shmangim të gjitha aspektet që kanë kthyer jetën politike të vendit në telenovelë rraspakitëse.

Për mua ka shumë më rëndësi kjo gjë sesa të përparojnë kantierët gjatë ditës. Ne po punojmë intensivisht për mandatin e tretë dhe së shpejti do dalim para shqiptarëve me programin e angazhimeve konkrete,” tha Edi Rama nga Sheshi Skënderbej në Tiranë ku po inspektonte procesin e vaksinimit të punonjësve të transportit publik.

E kur është fjala te pandemia, u pyet nëse do të kemi lehtësim të masave Anticovid, Kryeministri Edi Rama përveç ndryshimit të komunikimit publik u bë sikur respekton edhe institucionet. Nuk ishte më ai Rama që vendos në Facebook, tha se për lehtësimin e masave nesër do të vendos Komiteti i Ekspertëve.

“Ajo që unë mund të shtoj është se jemi në një situatë optimale në raport me strategjinë dhe planin e veprimit, por është shumë-shumë e rëndësishme që të mos harrojmë se sidoqoftë nuk kemi parashikueshmëri të plotë 100% lidhur me rrugën drejt daljes përfundimtare nga ky tunel dhe për këtë arsye duhet të vazhdojmë të jemi të kujdesshëm,” tha Kryeministri Edi Rama duke përfunduar:

“Nesër Komiteti do dalë me planin e ri, me lehtësim të mëtejshëm të masave dhe ambicia jonë për të pasur një sezon turistik shumë më të lehtësuar se sa ai i vitet të kaluar besoj se do të përmbushet!”