Zgjedhjet për Kryetarin e ri, Gjana: 75.067 anëtarë të PD do të votojnë në 76 qendra votimi

Kryetari i Komisionit Zgjedhor të PD, Jemin Gjana, duke bërë të ditur se ka përfunduar konstituimi i këtij Komisioni me plotësimin nga një anëtar përfaqësues për 4 kandidatët, tha se më 13 Qershor në zgjedhjet për Kryetarin e ri, janë 75.067 anëtarë të Partisë Demokratike që do të mund të votojnë në 76 qendra të votimit.

Sot, Jemi Gjana bëri publik vendimet e Komisionit Zgjedhor të PD që janë marrë për kandidatët, fushatën e tyre, anëtarët, qendrat e votimit, komisionet si dhe kalendarin e punimeve të këtij Komisioni.

Deklaratë:

Përshëndetje! Në fakt edhe për t’ju përgjigjur interesimit pothuajse të përditshëm të mediave, lidhur me fushatën zgjedhore, gjykuam t’ju informojmë për disa prej vendimeve që janë marrë, mënyrën se si po ecën fushatë, vendimet që janë marrë në Komisionin Zgjedhor të partisë, etj.

Dje pasdite kemi kryer konstituimin përfundimtar të komisionit, në kuptimin që jemi plotësuar me 4 anëtarë, përfaqësues të kandidatëve dhe kemi zhvilluar mbledhjen së bashku me ta.

Pas kësaj, komisioni ka përcaktuar në mbledhjen e djeshme një kalendar të ecurisë të të gjithë procesit të zgjedhjeve deri në ditën e shpalljes së kandidatit fitues.

Fushata ka nisur në datë 24 Maj dhe do të mbyllet në datë 11 Qershor, sepse pastaj fillon heshtja zgjedhore.

Deri në datën 3 Qershor, kryesitë e degëve të Partisë Demokratike në rrethe dhe kandidatët janë të detyruar të sjellin në Komisionin Zgjedhor të PD, emrat e anëtarëve të komisioneve.

Është përcaktuar një periudhë ku do të merremi me trajnimin e komisionerëve.

Deri në datë 6 Qershor do të miratojmë modalitetet e fletës së votimit, do të hedhim shortin e renditjes së kandidatëve.

Brenda datës 7 Qershor do të miratojmë vendvotimet, bazuar në propozimet e degëve.

Listën e votuesve dhe modalitetet përfundimtare të fletës së votimit do miratohen deri në datën 8 Qershor.

Materialet e votimit do të tërhiqen në datë 12 Qershor deri në orën 16.00 nga kryetari i komisionit dhe secili përfaqësues i kandidatëve që dëshiron të shoqërojë tërheqjen e materialeve të votimit.

Numërimi i fletëve të votimit do të kryhet duke nisur nga ora 19.30 derisa të përfundojë. Dhe deri në datën 14 Qershor në orën 08.00 të gjitha materialet e votimit, nga të gjitha komisionet, do të sillen në Komisionin Zgjedhor të partisë, ku do të hartohet përmbledhësja e gjithë procesverbaleve dhe do të shpallet kandidati fitues.

Ky është kalendari i veprimeve dhe procesit.

Dje në komisionin kemi shqyrtuar dhe kemi dakordësuar me të gjithë anëtarët e komisionit lidhur me axhendën e takimeve të kandidatëve, me mënyrën e rakordimit të kësaj axhende, me detyrimin e strukturave të partisë për të qenë të predispozuar, të detyruar në bazë të Statutit dhe vendimit të Kryesisë, për të caktuar dhe për të gjetur ambientet dhe për të ftuar anëtarësinë në këto takime.

Jemi dakordësuar gjithashtu, sikurse ju thash, për një proces të trajnimit të komisionerëve në të gjithë vendin. Mendohet që të bëhen trajnime në grupe zonash, mund të bëjmë një në Shkodër, një në Elbasan, një ndoshta në Fier, në Tiranë; d.m.th 4-5 të tillë. Do të bëhen trajnime nën moderimin e fondacionit “Konrad Adenauer”.
Këto trajnime mendohet të zhvillohet rreth datave 5- 10 Qershor, varësisht në datat që ekspertët e fondacionit “Konrad Adenauer” e asistojnë PD në të gjitha proceset e saj, për të vënë në dispozicion njerëzit e duhur.

Dje, gjithashtu kemi marrë vendimin për të përcaktuar numrin e qendrave të votimit dhe numrin e komisioneve të votimit për të gjitha degët e PD. Aktualisht janë 71 degë të PD, në 5 prej tyre do të ketë 2 komisione dhe 2 qendra votimi; këto janë Durrësi, Elbasani, Fieri, Kamza dhe Shkodra sepse bazuar në vendimin që është marrë nga Kryesia e PD, për arsye lehtësimi për degët që kanë mbi 2500 anëtarë do të ketë më shumë se një qendër votimi. Këto 5 degë në të gjitha vendin rezultojnë me më shumë se 2500 anëtarë, në të gjitha degët e tjera do të ketë një komision dhe një qendër votimi.

Numri i anëtarëve gjithsej është 75.067 anëtarë, të cilët janë të mbyllur në sistem, janë mbyllur me vendimin e komisionit që në momentin që është marrë vendimi në Kryesinë e PD dhe sistemi mund të check-ohet vetëm në praninë e 4 përfaqësuesve që 4 kandidatët kanë të drejtë të përcaktojnë ekspertë të IT, të cilët do të jenë prezentë në momentin që listat e këtyre 75.067 anëtarëve të shkarkohen për tu shndërruar në listat e votuesve.