Vuçiç: Vazhdimi i dialogut, çështje ditësh

Dialogu mes Kosovës dhe Serbisë do të vazhdojë brenda një afati të shkurtër kohor, tha presidenti i Serbisë, Aleksandar Vuçiç, duke konfirmuar se Serbia do t’i përgjigjet ftesës së Bashkimit Evropian. Sipas tij, vazhdimi i dialogut është çështje ditësh e jo javësh.

Këtë deklaratë, raporton RFE, Vuçiç e bëri sot një ditë pasi ai u takua me Zv/Ndihmës Sekretarin amerikan të Shtetit, Matthew Palmer dhe Përfaqësuesin e Posaçëm të Bashkimit Evropian për dialogun, Mirosllav Lajçak.

Gjatë bisedës me Palmer dhe Lajçak, Vuçiç tha se e ka përsëritur qëndrimin se, Serbia nuk është në favor të një konflikti të ngrirë.

Qëndrimi i dy diplomatëve perëndimorë në Prishtinë dhe Beograd, gjatë kësaj jave, kishte për qëllim përgatitjet për vazhdimin e dialogut mes Kosovës dhe Serbisë që ndërmjetësohet nga Bashkimi Evropian.

Më herët ishte paralajmëruar se takimi ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiç, do të zhvillohet gjatë muajit qershor, por data nuk është përcaktuar.

Aleksandar Vuçiç tha se me Palmerin dhe Lajçakun ka biseduar për temat e dialogut.

“Serbia është e gatshme të zhvillojë dialog për çështjen e personave të zhdukur,” tha Vuçiç duke përmendur gërmimet që janë bërë ditë më parë në varrezën masive në Kizhevak të Serbisë nga ana e komisioneve për të pagjeturit nga Serbia dhe Kosova me mbështetjen e Komisionit Ndërkombëtar për Personat e Zhdukur dhe EULEX-it.

Vuçiç dhe shteti serb vazhdojnë të mos tregojnë se ku janë varrezat masive me shqiptarë në tokën serbe por sot tha se Serbia ka informacione për vendet ku janë varrosur ushtarët dhe civilët serbë në Kosovë.

Ndryshe, me ndërmjetësimin e Bashkimit Evropian, dialogu midis Kosovës dhe Serbisë filloi në vitin 2011. Përmes tij synohet arritja e një marrëveshjeje gjithëpërfshirëse për normalizimin e raporteve mes dy vendeve.