Përgjigje Ambasadorit Kosnett, Albin Kurti: Nuk ka Asociacion mbi baza etnike!

Kryeministri i Kosovës, Albin Kurti tha se Kosova nuk mund të ketë Asociacion mbi baza etnike, për më tepër kjo është përcaktuar edhe në Aktvendimin e vitit 2015 të Gjykatës Kushtetuese. Kështu është përgjigjur mëngjesin e sotëm, Kryeministri Albin Kurti deklaratës së Ambasadorit amerikan Philip Kosnett se Kosova e ka detyrim të themelojë Asociacionin e komunave me shumicë serbe.

“Nuk mendoj që është e mundshme në rendin juridik dhe kushtetues të Kosovës të ketë asociacion mbi baza etnike. Mund të ketë asociacion të komunave mbi baza zhvillimore, mund të ketë mbi baza gjeografike. Ta zëmë asociacion të bjeshkëve të Rugovës, të maleve të Sharrit ose të Lumit Lepenc. Por asociacion mbi bazë etnike nuk mund të kalojë as sa i përket frymës e as germës së Kushtetutës së Kosovës. Dhe praktikisht një gjë të tillë e ka thënë edhe aktvendimi i Gjykatës Kushtetuese i publikuar me 23 dhjetor të vitit 2015,” tha Kurti për KosovaPress duke shtuar se është për të drejtat e të gjitha pakicave dhe kundër margjinalizimit apo diskriminimit ndërsa shtoi:

“Kërkesa për Asociacion etnik, e cila ka tash e gati një dekadë që mbahet aktuale nuk më duket që vie nga njerëzit e thjeshtë. Por nga politikanët e fqinjtë tonë veriorë”, ka deklaruar ai.

Ndryshe, Ambasadori i SHBA në Prishtinë, Philip Kosnett, dje tha për për Radio Kontakt Plus se Shtetet e Bashkuara besojnë se Kosova ka një detyrim për ta formuar Asociacionin e komunave me shumicë serbe ndërsa përfundoi:

“Historia nuk filloi në ditën kur u formua Qeveria e Kurtit, dhe ne besojmë se vendet kanë detyrimin t’i respektojnë marrëveshjet dhe zotimet e bëra më parë!”