Samiti i Vjenës, Albin Kurti përsërit kërkesën për Deklaratën e Paqes Kosovë-Serbi
Pas takimit në Bruksel me Presidentin e Serbisë, Aleksandar Vuçiç, në kuadër të dialogut Kosovë-Serbi, Kryeministri i Kosovës, Albin Kurti, ka kërkuar edhe në Samitin e Vjenës i cili u organizua nga Kancelari i Austrisë, Sebastian Kurz, e ku merrnin pjesë liderët e gjashtë shteteve të Ballkanit Perëndimor, që Kosova dhe Serbia të bëjnë një Deklaratë të përbashkët të paqes duke u zotuar se nuk do të sulmojnë njëra-tjetrën.
Me përfundimin e Samitit në Pallatin e Kancelarisë Federale, Albin Kurti përmes rrjetiti social Facebook bënë të ditur se kërkesës për Deklaratën e përbashkët të Paqes Kosovë-Serbi, ka theksuar se Kosova po e menaxhon mirë e me sukses pandeminë COVID-19, Kosova me qeverisjen e mirë dhe demokratike ka nisur reformat në drejtësi dhe ekonomi dhe të hiqen vizat për Kosovën në mënyrë që qytetarët tanë të udhëtojnë lirshëm në vendet e BE-së:
1. Kosova po e menaxhon mirë e me sukses pandeminë Covid-19. Mesatarisht kemi më pak se një person të infektuar në ditë për 100 mijë banorë dhe më pak se 10 raste aktive në 100 mijë banorë. Bashkimi Evropian do të duhej ta vendos Kosovën në mesin e shteteve të udhëtimit të sigurt lidhur me pandeminë Covid-19.
2. Kosova me qeverisjen e mirë dhe demokratike ka nisur reformat në drejtësi dhe ekonomi. Besimi qytetar në institucione është shumë i lartë. Krahasuar me vitin e kaluar eksportet i kemi rritur për 66%, aktivitetin ekonomik (qarkullimin) për 15%, kurse të hyrat buxhetore për 30%. Kemi nevojë për më shumë investime, dhe kompanitë austriake janë të mirëseardhura e të dëshiruara.
3. Kosova dhe Serbia të bëjnë një deklaratë të përbashkët të paqes me zotim për mos-sulmim, Serbia ta njohë pavarësinë e Kosovës dhe të ballafaqohet me të kaluarën, si dhe Kosova e Serbia të zbatojnë reciprocitetin sa i përket të drejtave të pakicave.
4. Të hiqen vizat për Kosovën në mënyrë që qytetarët tanë të udhëtojnë lirshëm në vendet e BE-së, kurse gjashtë shtetet e Ballkanit Perëndimor të kalojnë nga CEFTA në SEFTA (Marrëveshja Evropiane për Tregti të Lirë me Evropën Juglindore) sipas shembullit të EFTA-EEA, pra siç e kanë Lihtenshtajni, Norvegjia e Islanda me BE-në.
Ndryshe, në Samitin e Vjenës, Kosova është përfaqësuar nga kryeministri Albin Kurti, Shqipëria nga ministrja e Infrastrukturës dhe Energjetikës, Belinda Balluku, Serbia nga kryeministrja Ana Bërnabiç, Bosnja Hercegovina nga kryeministri, Zoran Tegeltija, Maqedonia e Veriut nga kryeministri Zoran Zaev dhe Mali i Zi nga kryeministri Zdravko Krivokapiç.
