Danimarka dhuron vaksina AstraZeneca për katër vende të Ballkanit

Danimarka do të dhurojë një milion vaksina AstraZeneca kundër koronavirusit për katër vende të Ballkanit Perëndimor. Duke bërë të ditur lajmin mbi këtë vendim të Qeverisë së Danimarkës, ministri i Jashtëm danez, Jeppe Kofod, tha se Shqipëria, Bosnje e Hercegovina, Kosova dhe Maqedonia e Veriut kanë nevojë për vaksina.

“Ballkani Perëndimor është pjesë e lagjes sonë dhe ne kemi interes të madh të përbashkët për të qëndruar së bashku – përfshirë në luftën kundër pandemisë,” tha Kofod.

Donacionet, raporton RFE, përbëhen nga vaksinat që Danimarka i ka blerë dhe paguar nga kompania anglo-suedeze AstraZeneca, por që nuk i janë dorëzuar ende.

Ndryshe, vaksina AstraZeneca nuk është duke u dhënë në Danimarkë. Pas raporteve se ajo mund të shkaktojë mpiksje gjaku te njerëzit e vaksinuar, autoritetet daneze e kanë ndaluar përdorimin e saj në mars, ndërsa në prill e kanë hequr tërësisht nga programi i imunizimit.