11 vjet nga vendimi i GJND, Presidentja e Kosovës: Koha që shtetet ta njohin realitetin e pakthyeshëm!

Duke përkujtuar 11 vjetorin e vendimit të Gjykatës Ndërkombëtare të Drejtësisë, GJND, se deklarata e Pavarësisë së Kosovës nuk e shkel ligjin ndërkombëtar, Presidentja Vjosa Osmani, thekson se shtetet që nuk e kanë njohur është koha ta njohin realitetin e pakthyeshëm, pavarësinë e Kosovës.

“11 vjet më parë, GJND vendosi që pavarësia jonë nuk shkel ligjin ndërkombëtar. Koha që shtetet që nuk e kanë bërë ende ta njohin këtë realitet të pakthyeshëm. Republika e Kosovës është këtu për të qëndruar: sovrane, e pavarur, demokratike dhe paqedashëse. Do të mbetet përgjithmonë kështu,” thekson Vjosa Osmani duke rikujtuar:

“Deklarata e shpalljes së pavarësisë së Kosovës është në përputhje të plotë me të drejtën ndërkombëtare.” Ishte kjo përgjigja e Gjykatës Ndërkomëtare të Drejtësisë në Hagë, ndaj kërkesës së Serbisë, që organi më i lartë juridik i Organizatës së Kombëve të Bashkuara të përgjigjet në pyetjen: “A ishte Deklarata e njëanshme për pavarësi e shpallur prej organeve të përkohshme të vetëqeverisjes, në përputhje me të drejtën ndërkombëtare?”.

Në emër të 15 gjykatësve të GJND-së, Presidenti i saj Hisashi Owada bëri të ditur se gjykatësit kanë marrë këtë vendim duke pasur parasyshë të gjithë elementet e rëndësishme për këtë proces dhe kanë konstatuar se ky institucion e ka të drejtën që të japë mendimin juridik për çështjen e shtruar.

Në arsyetimin i cili zgjati rreth një orë e gjysmë, Presidenti i Gjykatës Ndërkombëtare të Drejtësisë, Hisashi Owada fillimisht përshkroi rrethanat që kanë sjellë deri tek shpallja e pavarësisë dhe rikujtoi dokumentet që janë nxjerrë lidhur me Kosovën.

Mendimin e Serbisë se Deklarata e Pavarësisë ishte shkelje e të drejtës ndërkombëtare e mbështetën vetëm 4 nga 15 gjyqtarë të Gjykatës Ndërkombëtare të Drejtësisë që e shqyrtuan Kërkesën serbe.

Ndryshe, Kosova shpalli pavarësinë më 17 shkurt të vitit 2008.