Aksident me autobusin e linjës Frankfurt-Prishtinë, 10 të vdekur e 44 të plagosur

Dhjetë persona kanë vdekur dhe 44 kanë mbetur të plagosur pas daljes nga rruga të autobusit me targa të Kosovës, në autostradën afër Sllavonski Brodit në Kroaci. Ministria e Punëve të Jashtme dhe Diasporës e Kosovës, tha se të vdekurit janë bashkatdhetarë, të cilët kanë qenë duke udhëtuar me autobusin e linjës së rregullt Frankfurt-Prishtinë.

Përveç 10 të vdekurve, 15 të plagosur janë në gjendje të rëndë, aktualisht 42 të plagosurit po trajtohen në spitalin në Sllavonski Brod, një pacient është dërguar në Nova Gradishka dhe një tjetër në Zagreb.

“Qeveria e Republikës së Kosovës, do të jetë e angazhuar në orët në vazhdim për t’iu dalë në ndihmë qytetarëve të lënduar dhe për t’iu asistuar bashkatdhetarëve dhe familjarëve të tyre në të gjitha procedurat e nevojshme,”thuhet në njoftimin e MPJD-së e cila ka ngushëlluar familjarët e viktimave dhe u ka dëshiruar shërim të shpejtë të plagosurve.Ende nuk dihet se cili është shkaku i aksidentit.

Arrestohet shoferi

Zëvendës-Prokurori i Shtetit Komunal Sllavko Pranjiç, tha se shoferi, i cili është gjetur në vendin e ngjarjes, është arrestuar ndërkohë.

“Shoferi është arrestuar nën dyshimin për drejtim të automjetit në mënyrë jo të duhur. Shkaqet e daljes nga rruga të autobusit do të përcaktohen kur të merren provat,” tha Pranjiç duke shtuar se përgjatë dëshmisë së tij, shoferi ka thënë se ka rënë në gjumë për një moment.

“Por ne do të përcaktojmë gjithçka më vonë,” tha Pranjiç.

Më herët, drejtori i Mbrojtjes Civile Kroate, Damir Trut, tha për media se nëntë pasagjerë dhe një shofer kanë vdekur, duke deklaruar se në autobus kanë qenë 67 udhëtarë dhe dy shoferë.

Ministri kroat i Shëndetësisë Vili Berosh, ndërkohë tha në vendin e aksidentit se, në autobus kanë qenë 15 të mitur, prej të cilëve, një vajzë e plagosur rëndë.

Albin Kurti niset drejt Kroacisë

Presidentja e Kosovës, Vjosa Osmani, e ka quajtur tragjik, lajmin për aksident.

“Me zemër e me shpirt sot jemi me familjet që humbën më të dashurit në këtë tragjedi. Dhimbja është e papërshkrueshme e humbja shumë e madhe. Ngushëllime të sinqerta për të gjithë! Shteti i Kosovës do të jetë në krah të familjeve të atyre që humbën jetën, sikurse edhe të të lënduarve, të cilëve ju dëshiroj shërim të shpejtë,” tha Vjosa Osmani.

I menjëhershëm dhe reagimi i Presidentit të Kroacisë, Zoran Millanoviç, duke shprehur ngushëllime për familjet e pasagjerëve të vdekur ndërsa shtoi se është me autoritetet dhe popullin e Kosovës në këtë moment të vështirë për ta.

“U uroj shërim të shpejtë pasagjerëve të plagosur,” tha Milanoviç përmes rrjetit social Facebook ndërsa Kryeministri Andreja Plenkoviç nga ana e tij shprehet:

“Me hidhërim të madh mora lajmin për aksidentimin e autobusit tek Slavonski Brod ku humbën jetën 10 persona. Bashkëndjejmë me familjet e viktimave, autoritetet dhe popullin e Kosovës, të cilëve u shprehim ngushëllime të thella. Shpresoj që pasagjerët e plagosur të shërohen”.

Ndërkohë Qeveria e Kosovës ka njoftuar se kryeministri i Kosovës, Albin Kurti është nisur drejt Kroacisë, bashkë me disa ministra.

“Së bashku me kryeministrin kanë udhëtuar edhe zëvendëskryeministrja dhe ministrja e Punëve të Jashtme dhe Diasporës, Donika Gërvalla, ministri i Punëve të Brendshme, Xhelal Sveçla, ministri i Shëndetësisë, Arben Vitia dhe shefi i Stafit të Kabinetit të Presidentes së Kosovës, Blerim Vela,” thuhet në njoftimin e kryeministrisë.

Policia kroate e ka konfirmuar më herët se autobusi ka qenë me targa të Kosovës.

“Gjatë hetimit, policia ka konstatuar se bëhet fjalë për një autobus me tabela të Kosovës dhe sipas informacionit që kemi aktualisht, dhjetë persona kanë vdekur dhe dhjetëra të tjerë janë dërguar në spitalin në Sllavonski Brod për trajtim mjekësor”, tha zëdhënësi i Policisë në Brod Posavina, Damir Breziç, për Radio Televizionin Kroat, HRT.

Sipas tij, situata është shumë e vështirë dhe se shumë persona janë në rrezik për jetën.

Shefi i policisë së trafikut në Sllavonski Brod, Franjo Galiq, tha se policia është njoftuar në orën 6:20, se një autobus ka dalë nga rruga.

“Pas mbërritjes në vendin e ngjarjes, është përcaktuar se ishte një autobus me targa të Kosovës, i cili po udhëtonte në linjë të rregullt Frankfurt-Prishtinë”, tha Galiç.

Flet djali i shoferit të vdekur

RFE ka biseduar me djalin e shoferit të autobusit Deva Tours, i cili është raportuar se ka vdekur.

Adhurim Sylmetaj (i biri i Naser Sylmetajt), nga fshati Gërçinë në afërsi të Gjakovës, tha se babai i tij ka rreth tetë muaj që ka filluar punën në këtë kompani.

“Janë nisur para 3-4 ditëve, edhe në momentin që kanë mbërri, menjëherë, veç atë mbrëmje kanë pushuar, dhe menjëherë të nesërmen në mëngjes rreth orës 09:00 janë nisur për në Kosovë”, tha Sylmetaj për RFE.

“Herën e fundit kur kam folur me të ka qenë në momentin kur e kaluar kufirin Gjermani-Austri”, tha Sylmetaj.

Shoferi tashmë i ndjerë kishte vozitur autobusin për disa orë. Aksidenti besohet se ka ndodhur pasi ai është ndërruar nga shoferi tjetër, i cili është intervistuar nga policia kroate. Aksidenti ka ndodhur afër pikës për pagesën e rrugës./RFE/