Afganët mbërrijnë në Qytet Studenti: Tani jemi të qetë…

Afganët që mbërritën pas mes natës në Shqipëri u strehuan në godinat e Qytetit Studenti në Tiranë. Sot ata flasin për talibanët, rrezikun, por dhe ditën e sotme pasi janë akomoduar në Qytet Studenti dhe ndjehen të qetë.

Një student nga Afganistani thotë se talebanët janë të rrezikshëm dhe se shpreson që situata në vendin e tij të bëhet më mirë.

“Situata është e keqe, por shpresoj të bëhet më mirë. Ne jemi studentë, talebanët janë të rrezikshëm,” thotë një stundent nga Afganistani ndërkohë një gazetar shprehet se në Shqipëri ndihet mirë. Situata në Kabul, thotë ai, është shumë e keqe, ndërsa shton se plani i tyre është që të qëndrojnë për disa javë në Shqipëri dhe më pas të largohen në SHBA.

Ndryshe, shumica prej 154 afganëve që mbërritën pas mesnatës në Shqipëri dhe u strehuan në Qytet Studenti, sipas Kryeministrit Edi Rama dhe Ministres së Jashtme, Olta Xhaçka, janë aktivistë, gazetarë e studentë, që u rrezikohej jeta në Afganistan. Mësohet se ata do të qëndrojnë në Qytet Studenti në Tiranë derisa të lirohen strukturat hoteliere në Durrës, aktualisht të zëna me turistë.