500 mijë vaksina Pfizer për Kosovën, Presidentja Osmani falënderon Zv/Presidenten Harris
Gjatë kësaj jave SHBA do ti dorëzoj Kosovës 503.100 vaksina Pfizer ndihmë për të cilën Presidentja Vjosa Osmani ka falënderuar sot Zv/Presidenten e SHBA, Kamala Harris.
Partneriteti i shkëlqyeshëm mes dy vendeve dhe raportet e veçanta ndërmjet Kosovës dhe SHBA ishin në qendër të bisedës telefonike që Presidentja Osmani zhvilloi me Zv/Presidenten Harris ku i shprehu dhe mirënjohjen e përhershme të popullit të Kosovës për mbështetjen e vazhdueshme nga Shtetet e Bashkuara duke ritheksuar se SHBA mbeten partner kryesor strategjik i vendit tonë në procesin e konsolidimit të shtetësisë, thuhet në njoftim të Presidencës së Kosovës.
Ndërsa Zv/Presidentja Harris nga ana e saj theksoi se SHBA janë thellësisht mirënjohëse ndaj Kosovës për bashkëpunimin e ngushtë dhe gatishmërinë e bujarinë e treguar për mikpritjen e mijëra qytetarëve afganë. Ajo shprehu gjithashtu mirënjohjen e administratës Biden për mbështetjen e Kosovës në këtë mision dhe ritheksoi lidhjen personale dhe të thellë midis Administratës Biden dhe popullit të Kosovës.
Gjatë bisedës, Zv/Pesidentja Harris përcolli falënderimin e saj të përzemërt për organizimin e ceremonies nga ana e Presidentes Osmani për dhënien e Medaljes Presidenciale për Sundim të Ligjit për të ndjerin Joseph Robinette “Beau” Biden III.
Në këtë shkëmbim të parë ndërmjet të dy lidereve, Presidentja Osmani shfrytëzoi rastin që edhe njëherë ta urojë Zv/Presidenten Harris për emërimin në pozitën e dytë më të lartë shtetërore.
Osmani theksoi se emërimi i Harris si Zv/Presidente e parë grua e SHBA, si dhe shembulli i dhënë prej saj, do të mbeten të shënuara si moment lavdie në historinë tonë moderne. Puna dhe angazhimi i saj, sipas presidentes Osmani shërbejnë si inspirim dhe për shumë gra e vajza lidere të së ardhmes anë e mbanë botës.
Presidentja Osmani e ftoi Zv/Presidenten Harris ta vizitojë Kosovën, për t’i parë për nga afër sukseset tona të përbashkëta. Të dy lideret u pajtuan që të takohen personalisht së shpejti.
Ndryshe, Shtpëpia e Bardhë gjatë kësaj fundjave do t’i dorëzoj Kosovës 503.100 doza të vaksinës Pfizer kundër COVID-19, raporton RFE, teksa vendi po përballet me rritje të rasteve të reja dhe vdekjeve nga koronavirusi.
“Shtetet e Bashkuara janë të përkushtuar që të sjellin të njëjtën urgjencë në përpjekjet ndërkombëtare për vaksinim siç ne e kemi demonstruar në SHBA dhe ne po punojmë që të sjellim sa më shpejt që të jetë e mundur në Kosovë vaksina të sigurta dhe efektive,” thaekson Shtëpia e Bardhë.
