13-14 Shtator, Kancelarja Merkel në Beograd dhe Tiranë

Në turin e saj lamtumirës në Ballkan më 13 dhe 14 Shtator, Kancelarja gjermane Angela Merkel pritet ta vizitoj Beogradin dhe Tiranën.

Presidenti i Serbisë, Aleksandar Vuçiç, tha se është nderi i madh që më 13 Shtator, Angela Merkel viziton Serbinë në fund të mandatit të saj, ku pritet të takoj krerët e shtetit serb ndërsa më 14 shtator në Tiranë do të takohet me liderët e Balllkanit dhe organizatat e shoqërisë civile.

“Gjermania është bindshëm partneri më i madh ekonomik i Serbisë dhe në kompanitë gjermane aktualisht punojnë 71.000 qytetarë serb, ndërsa gjatë dekadës së fundit është shënuar një rritje e shkëmbimit tregtar në mes të dy shteteve prej 250 për qind,” tha Vuçiç në një transmetim të drejtpërdrejtë televiziv duke folur për vizitën e kancelares gjermane.

Nëdërkohë në Tiranë sot Ambasada gjermane ka dhënë detaje lidhur me vizitën e saj më 14 Shtator ku përveç Kryeministrit Edi Rama pritet të takoj në takime dypalëshe edhe Kryeministrin e Kosovës, Maqedonisë Veriut, Malit Zi dhe Bosnje Hercegovinës.

Njoftim:

Kancelarja Angela Merkel do të vizitojë Shqipërinë të martën, më 14 shtator

Në Tiranë ajo do takohet fillimisht për një bisedë me kryeministrin Edi Rama. Të planifikuara janë biseda që lidhen me çështjet e politikës ekonomike dhe marrëdhëniet dypalëshe midis Shqipërisë dhe Gjermanisë, por edhe çështje që lidhen me përafrimin me BE-në.

Në bisedimet e mëpasme me krerët e qeverive të gjashtë shteteve të Ballkanit Perëndimor, në plan të parë do të jenë çështjet e bashkëpunimit rajonal. Gjithashtu janë planifikuar bisedime dypalëshe me krerët e qeverive të Kosovës,  Bosnje dhe Hercegovinës, Malit të Zi dhe Maqedonisë së Veriut.