Hahn apelon për hapje negociatash. Por…

Komisioneri i BE-së për zgjerimin, Johannes Hahn i bën thirrje BE të hapë negociatat e anëtarësimit me Shqipërinë dhe Maqedoninë. Sipas tij, BE duhet t’i japë një sinjal pozitiv gjithë Ballkanit Perëndimor

Këtë kërkesë, Hahn e bëri sot përkundër kundërthënieve mes 28 shteteve anëtare të bllokut në lidhje me atë se a duhet t’u lejohet nisja e bisedimeve për anëtarësim të Shqipërisë e Maqedonisë, raporton RFE.

Dy vendet në fjalë shpresojnë që ministrat e Jashtëm të BE-së do të pajtohen për dhënien e dritës jeshile gjatë një takimi në Luksemburg më 26 qershor, që do t’i hapte rrugën aprovimit nga liderët e BE-së në një samit më 28-29 qershor.

Por zyrtarët e BE-së theksojnë se Franca dhe Holanda ka gjasa që të kërkojnë kushte tjera, siç janë reformat e mëtejme për të luftuar korrupsionin dhe krimin e organizuar në Shqipëri dhe Maqedoni.

“Mendoj se të gjithë duhet të jenë të vetëdijshëm – dhe shpresoj se kështu do të jenë – se sa e rëndësishme është të jepet një sinjal pozitiv për rajonin”, tha Hahan në konferencën ndërqeveritare BE-Mali i Zi në Luksemburg.

Ai tha se Maqedonia duhet të “shpërblehet” për nënshkrimin e marrëveshjes me Greqinë këtë muaj për të ndryshuar emrin e saj në “Republika e Maqedonisë Veriore”, duke i dhënë fund kështu mosmarrëveshjes 27 vjeçare mes Shkupit e Athinës.

“Mendoj se nëse kjo nuk shpërblehet në mënyrë kuptimplotë, do të ketë ndikim të menjëhershëm dhe të madh për stabilitetin e rajonit”, tha Hahn duke shtuar:

“Kemi arritur shumë dhe nëse i shikoni arritjet madje edhe në muajt e fundit në rajon… e tërë kjo është rezultat i perspektivës evropiane”, tha zyrtari i BE-së, duke shtuar: “Nëse kjo nuk shihet, nuk kuptohet dhe nuk reagohet ndaj kësaj në mënyrë adekuate, nuk do ta kuptoja këtë”.

Përveç Shqipërisë e Maqedonisë, edhe katër vende tjera ballkanike janë jashtë Bashkimit Evropian: Kosova, Mali i Zi, Bosnja e Serbia.