Pas përjashtimit të Berishës, Rama: Pa marrë parasysh zhvillimet brenda PD…

I fituari i vetëm pas vendimit të Kryetarit të PD, Lulzim Basha, për përjashtimin e liderit historik Sali Berisha nga Grupi Parlamentar, Kryetari i PS, Edi Rama, sot pas seancës së parë plenare të Legjislaturër së X-të tha se pa marrë parasysh si do shkojnë zhvillimet brenda PD, dora e tij ngelet e shtrirë.

I relaksuar si kurrë më parë si në seancë ashtu dhe jashtë saj, ashtu si dhe mijëra patronazhistëve që nuk kanë ndërhyrë fare në marrëdhëniet mes demokratëve që miratuan dhe atyre që kundërshtuan vendimin e Bashës, sot kur u pyet nga gazetarët nëse Lulzim Basha kishte “vrarë babain e tij politik” ai u shpreh:

“Unë do të angazhohem personalisht dhe PS do të bëjë përpjekjet që të kemi sa më shumë energji të shpenzuara për njerëzit, për problemet e tyre reale. Për sfidat e përbashkëta që ka vendi, për ëndrrat dhe shpresat e tyre, sa më pak energji për atë që politika ka bërë fatkeqësisht në këto vite duke u bërë një pronë e politikanëve, të cilët e kanë abuzuar vijimisht për qëllime, interesa për ambicie që mund të jenë edhe të natyrshme, por që sjanë kurrë të mjaftueshme për t’u ngritur mbi ambiciet dhe hallet e njerëzve,” tha Rama sikur ka takuar fermerët që kur u flet ndonëse jep mijëra premtime ata asgjë nuk kuptojnë dhe të dyja palët janë të kënaqura ama i delë nga goja dora e shtrirë:

“Ne vijmë në këtë Kuvend për mandatin tonë të tretë me dorën e shtrirë, pa marrë parasysh si do shkonin zhvillimet brenda PD, dhe dora është e shtrirë për të bashkëpunuar në funksion të njerëzve e të vendit” -tha Rama, ndërsa iu përgjigj akuzave për pazare politike.”